Chenna In thiat duh lo te thiah sak zel an ni

National Highway-54 laihzauh hna thawh mekah zangnadawmna pek tawh zinga mahni In leh bungrua la senghawi lo te senghawi sak hna chu thawh zel niin nimin khan Lunglei leh Siaha District-ah chenna In thenkhat te chu thiah sak leh an ni.

National Highway-54 kawngpui laih zauh hna thawh mekin an chenna In a tihchhiat dawn avanga zangnadawmna pek tawh, hemi hnua an chenna In thiahna tur thupek ‘Eviction Notice’ pawh pek tawh chunga an chenna In la thiat duh lo leh insenghawi duh lo te senghawi sak hna thawh mekah nimin khan Lunglei District chhunga In la thiat lo te chu lunglei District Bawrhsap aiawhin K. Lalhlimpuia, Assistant Settlement Officer leh Executive Magistrate ni bawk hova enfiah leh a ni a, Zobawk North-a Lalramnghaka chuan Sawrkar thupek zawmin a chenna In lo thiatin Dawn khuaa K. Lalengliani pawhin an Vawk Farm a lo thiat mek a, heng te hi enfiah a nih hnuah thiah chhunzawm sak an ni.

Siaha District-ah pawh Kawlchaw leh Tuipang inkar kawngpui laih hnathawh kal meka zangnadawmna dawng tawh, an chenna In thiat duh lo chhungkaw paruk te chu niminpiah khan Siaha District Bawrhsap VL. Hruaizela Khiangte thupekin khawl hmangin an In thiah sak an ni a, heng te hi Theiri leh Tuipang khuaa mi te niin Dan anga an chenna In thiat tura 'eviction notice' vawi nga lai pek an nih tawh hnuah pawh hmalakna engmah an neih loh avangin an In hi thiah sak an ni a, he hunah hian Sub-Divisional Magistrate leh Executive Magistrate te bakah Dan leh thupek keng-kawhtute an tel a ni.