Serchhip District Miss-ah R. Vanlalawmpuii

Miss Mizoram 2024 thlanna neih tura Serchhip District aiawh turin R.Vanlalawmpuii, New Serchhip Khawtetlang chu thlan a ni.

Miss Mizoram 2024 thlanna a neih tura Serchhip District aiawh tur puanchhuahna hi nizan khan Lalro Digitals Studio, Serchhip-ah neih a ni a, Serchhip DIPRO Lalnunmawii MIS chuan Miss Mizoram 2024 thlanna a neih tura Serchhip District aiawh turin R.Vanlalawmpuii chu thlan a nih thu a puang a, ‘Serchhip District Miss’ nihna chu a hlan nghal a. Hemi hnu hian kumin-a Chapchar Kut Miss R. Lalvenhimi’n Crown/Tiar khumtirin MHIP Sub-Hqrs. Serchhip President Lianthangi’n Sash a bahtir bawk a ni.

R. Vanlalawmpuii hi New Serchhip Khawtetlang-a cheng R.Lalhlimpuia leh H.Lalduhzuali te fanu neihchhun niin unau pathum zinga a milai a ni a, December 16, 2003-a piang a ni a, Govt. Serchhip College a zirlai niin Miss Mizoram 2024 thlanna neih turah Final Round atangin Serchhip District aiawhin a tel dawn a ni.

Nizan-a he hun hman hi Organising Committee Chairman Kapliana Pachuau chuan kai-hruaiin sawmbik mi tlemte ten a hmunah he hun hi an telpui a ni.