Mi pathum man an ni tawh

Vairengte Forest Range Staff leh Excise & Narcotics Department tangkawp ten tun thla ni 5-a Saphu kawr kg. 98 vel an man chhuizuina kal zelah mi pathum man an ni.

Kolasib Divisional Forest Officer (DFO) Margaret Lalramchhani’n thuchhuah siama a tarlan dan chuan, tun thla ni 5 zing dar 4:40 vel khan Vairengte Forest Range Staff leh Excise & Narcotics Department tang-kawp ten heng Saphu kawr hi phailam atanga Mizoram-a rawn phur chhoh chu an man a, a phurhna lirthei khalhtu Laldaniela, Shillong mi nia inchhal pawh manin lirthei-ah hian amah chauh a chuang a ni.

He thubuai chhui zuina kal zelah hian hetiang lam sumdawnna lama a zawmpui te chhui chhunzawm nghal a ni a, inhnamhnawih ngei nia hriat mi pahnih, Lalzuithangi (41), Champhai leh Vanlalzawni (42), Zemabawk, Aizawl te chu man an ni a; Aizawl lam atangin mi pakhat, Laltanpuia, Bethlehem Vengthlang, Aizawl-a khawsa mek nia insawi chu man a ni bawk a. Lalzuithangi hi Wildlife Crime Control Bureau te pawhin hun engemaw chen atanga an lo chhui tawh a ni. Heng Saphu kawr hi ‘Vawksa rep’ tiin an thawn niin a phurhna lirthei khalhtu hian a sawi a ni.