Sponsorship & Foster Care Fund dawng turte kokhawm

Serchhip-a District Child Protection Unit (DCPU) Office chuan kumin a Serchhip District chhunga Sponsorship & Foster Care Fund atanga sponsorship an pek naupang 125 te leh an nu leh pa te chu nimin khan Serchhip Kawnpui VC Hall-ah kokhawmin he ruahmanna leh naupang humhalhna Dan leh hriattur pawimawh hrang hrangte an hrilhfiah.
Serchhip District Child Protection Officer Lalsiampuii kaihhruaia he hun hman ah hian DCPU Serchhip a Protection Officer (Non Institutional Care) Vanlalmuanpuii chuan Sponsorship & Foster Care Fund kalphung hrilhfiahin, he sum hi naupang ten zirna kawnga hma an sawnna atan te, Medical mamawh phuhrukna atan leh naupang thanlenna kawnga mamawh hrang hrangte phuhrukna atana hman tura pek an nih thu te a sawi a. Thil dang atana lo hman chu a remchan loh thu a sawi bawk.

Kum 2023-2024 Financial year chhunga Mission Vatsalya (Child Protection Services) hnuaia Serchhip District chhunga tanpuina dawng tur naupang mi 125 te hi kumin February 15 khan Serchhip District Sponsorship and Foster Care Approval Committee chuan an lo thlang tawh a. He Sponsorship Programme hi kum 2013 atanga kalpui niin naupang kum 18 hnuailam, harsatna hrang hrang leh retheihna avanga zirna mamawh, eitur leh damdawi hmanga inenkawl ngai, inenkawlna tur nei si lo te chhawmdawlna tur atana duan a ni a. He ruahmanna hnuaia tanpuina dawng tura thlan te hi thla tin Rs. 4000/- a tanpui thin an ni.

Nimin-a he hun hman hi Child Welfare Commitee (CWC) Serchhip District-a Chairperson Lalduhawma Khiangte leh Member Lalthlamuani te pawhin an telpui a. Juvenile Justice (Care and Protection of Children) Act 2015, Protection of Children from Sexual Offences Act (POCSO) 2012 leh nu leh pa mawh-phurhna te inhrilhfiah a ni bawk.