Thlantlin chuan NDA Seat-ah thuin Ram leh Hnam leh Sakhaw himna atan theihtawp chhuah inhuam

Lok Sabha Inthlanpui neih tura MNF Candidate K. Vanlalvena chuan thlantlin a nih chuan NDA Seat-ah a thu dawn tih sawiin, ram leh Hnam leh Sakhaw himna turin theihtawpin Parliament chhung leh pawnah a tul apiang ti turin a inhuam tih a sawi.

Inrinni-a Aizawl Press Club-a thuthar thehdarhtute a kawmna ah Rajya Sabha MP nilai leh Lok Sabha Inthlanpui neih tura MNF Candidate tur K. Vanlalvena chuan NDA chu Congress kaihhruai UPA Sawrkar kal dan duh loh avanga intelkhawm an nih avang leh NDA sawrkar hma daih atanga in telkhawm an nih thu leh a dintu zingah MNF pawh a tel tih a sawi a. Tun tum Lok Sabha Inthlanpui ah thlantlin a nih chuan NDA Seat-ah a thu dawn tih sawiin, “NDA sawrkar hian India ram hi economic lamah a chawikang nasa a, hmarchhak-ah pawh hmasawnna an thlen nasa hle. An sawrkar leh ngei dawnin a lang a, keini ang State pachhia tan chuan Central Sawrkar kan ngheng a ngaihna chin a awm,” a ti.

MNF Lok Sabha MP Candidate K. Vanlalvena chuan thlantlin a nih chuan ram leh hnam leh Sakhaw himna turin theihtawpin Parliament chhung leh pawnah a tul apiang ti turin a inhuam tih sawiin, ram tana hma alo lak te chu mipuiten hre reng turin a duh tih a sawi a. BJP hruaitu thenkhat zingah India ram Hindu rama siam tum an awm nia hriat a nih thu sawiin, na takin dodal zel an tum thu sawi a, Hnam leh Sakhaw tenau zawkte tana tha lo tura chet an tum chuan na takin an dodal thin tih sawiin, a aia na zawka an dodal zel pawh a la tul dawn tih a sawi a, a tul phawt chuan ram leh hnam leh sakhaw himna atan NDA chhuahsan chu an party in an hreh lo tih a sawi bawk. Inthlanpui neih turah sum leh pai emaw, chhung leh khat te emaw chhuan tur engmah a nei lo tih sawiin, “Zoram mipuiten kan ram tana kan thil tih tlawm te te min hriatsaka min khawngaihna dawn beiseiin, Pathian kutah ka innghat a ni,” tiin Zoram mipuite chu amah Vote theuh turin a sawm bawk.

He hunah hian MNF Treasurer Lalruatkima pawhin Lok Sabha MP ni lai C. Lalrosanga chu Mizoram tan hnuhma tam tak a nei tawhin a kum alo upat deuh tawh avangin midang ti tawh zawk turin party-ah a rawn thlen tih a sawi a, party-in candidate atan dah nawn duh viau mah se mi tha tam tak an neih avangin K. Vanlalvena chu an dah tih a sawi a. Mizoram Politics-ah MP inthlan chu ruling chanvo a lian thin tih sawiin, hun inthlakah Common Candidate-te neih chhoh thin niin tun inthlan lo awm turah Congress te nen inbiakna awm mah se harsatna hrang hrang a awm avangin party malin an kal leh zawk tih a sawi a, Common Candidate an neih theih tak lohah chuan K. Vanlalvena an ruat ta tih sawiin, K. Vanlalvena ang chu Party dangin nei ve se an dah ve vekin a rinawm tih a sawi bawk.