Bekang-ah natna hrik hmu

Tunhnai a Khumtung khua mi 67 ten Bekang an eisual leh nausen pakhat thih phah chu enfiah a nih hnuah Khawsikpui (typhoid) thlen theitu natna hrik ‘Salmonella Typhi’ hmuhchhuah a ni.
Health and Family Welfare Department-a Food & Drugs Administration Joint Director Lalsawma sawi danin mithiamte chu Khumtung-ah kalin an Bekang eisual sample chu lain Selesih-a College of Veterinary Science and Animal Husbandry-a Laboratory-ah endik a ni a. Laboratory-a endikna-ah hian Bekang umah hian Salmonella Typhi natna hrik hi hmuhchhuah a ni. Mithiamte chuan Salmonella Typhi hi khawsikpui thlen theitu Bacteria a ni tih sawiin, tui emaw eitur emaw tih bawlh-hlawh leh thianghlim tawk lovah a darh thei a. Mihring in a lem hnu-ah lo puangin thisen kalkawng ah a taidarh ta thin a ni. 

Khumtung khua a chhungkaw engemaw zatin March ni 9, 2024 khan Kohhran hmeichhe pawl pakhat Bekang zawrh chu eisualin an dam loh phah a, a na zual mi 45-te chu Aizawl damdawi In hrang hranga enkawl turin Khumtung Health Sub-Centre atanga thawn an ni a, an zinga nausen kum khat leh thla 9 mi chu March 15 zan khan a boral a, tunah hian mi 2 chu enkawllai an la awm bawk a ni.