Ainawn Veng-a sawrkar quarters te thiah tum a ni

Aizawl Ainawn Veng (Govt. Complex tia hriat thin)-a sawrkar building leh quarters-te chu mihring chenna atan a him tawk tawh lova hriat a nih avangin thiah tura ruahman a ni a. Building thiah hmasak tur pawh ruahman fel a ni tawh.

Mizoram sawrkara General Administration Department (GAD)-in hriattirna a chhuah a tarlan a nih danin quarters thiah hmasak turte hi L-I/7/A-D, L-I/8/A-D, L-I/9/A-D, L-I/ 13/A-D, L-I/18/A-D te an ni a, heng Quarters luah mekte chu order chhuah (March 11, 2024) atanga thla khat (1) chhunga chhuahsana lo tiruak vek tura hriattir an ni a. Huntiam ral hnuah chuan a hranpa a inhriattir ngai tawh lovin sawrkarin a thiat zui tawh ang. 

June 22, 2023 khan Mizoram sawrkar-a GAD chuan Ainawn Veng-a sawrkar quarters Type I, II, III leh IV luahtu chhungkaw za chuangte chu ni 60 chhung ngeia an chenna chhuah-san turin a lo hriattir tawh a. June 18, 2023-a Council of Ministers thukhawm chuan building/quarters-te chu chhiatrupna thleng thei pumpelh nan building-te tihruaha thiah nghal nise tiin thutlukna a lo siam tawh bawk a. Govt. Complex Quarter Allottee Welfare chuan July 15, 2023 hmaa Order hi sut turin sawkar chu an ngen thung a ni.

Hetianga sawrkar in thutlukna a siam hnu hian Quarters luahtu, sawrkarin chhuahsan tura a tihte chu December 31, 2023 thleng hun pawhsei sakin Quarters luahtute chu an himna turin huntiam nghak kher lovin a rang thei ang bera chhuahsan tura hriattir an ni a. Sawrkarin hun-tiam a pawhsei sakah hian building panga huam loh a awm thung a, chungte chu thiah hmasak tura ruahman a ni a. A dang pawh a tahtawla thiah tur a ni bawk. Tunah hian Aizawl Ainawn Veng-a sawrkar Quarters luah hi chhungkaw 180 bawr an awm mek a ni.