Serchhip District mipui ten harsatna nei lova Vote an thlak nan ruahmanna siam a ni
Lok Sabha Inthlanpui neih tur atana inbuatsaihna kel mekah hian nimin khan Serchhip District Bawrhsap leh District Election Officer David Lalthanluanga chuan Serchhip District chhunga sawrkar Department hrang hranga Head of Office te Serchhip DC Meeting Hall-ah kokhawmin inthlanpui kaihhnawiha thil pawimawh hrang hrang a sawipui a. He hunah hian Bawrhsap chuan Department tin hotute chu inthlan ah mawhphurhna pawimawh tak tak chelhtute an ni tih sawiin, a hming hmerha ruat ni lo te pawh inthlan kaihhnawihah chuan sawrkar hnathawk zawng zawng te an pawimawh vek tih a sawi a, inthlanna felfai leh thianghlim a awm theihna turin an hmazawna tih tur awm te tha taka hlen chhuak turin a chah a ni.
He thutkhawm ah hian Inthlanpui-a Duty turte kalna turin kawng chungchang ah harsatna a awm rih lo tih tarlan niin Hriangtlang, Hmunzawl leh Sialhau te erawh chu ruahtui a tla a nih chuan harsatna a thleng palh thei tih tarlan a ni a, PWD chu heng kawng hi lo enzui tura tih an ni a. Polling Station hrang hranga tui pek chungchangah pawh thingtlang khua te chu Tui connection pek fel a nih tawh thu leh khawpui chhunga mi te pawh MLA Inthlanpui-a an kalpui angin harsatna awm lo tura beisei a nih thu tarlan a ni a. Power Supply pawh harsatna awm .lo tura beisei niin Internet Connection-ah pawh harsatna awm lo tura ruahmanna siam a ni a, Inthlana Duty tur Manpower chungchang te leh Polling Station tina mamawh te a awm kim leh kim loh sawiho a ni bawk.
Serchhip District chhungah hian Polling Station 88 a awm a. Election Commission of India duhdan angin heng Polling Station zawng zawngah hian mipui nawlpui bakah rualbanlo (Person with Disabilities) ten awlsam leh nuamsa zawka vote an thlak theihna tur atan Assured Minimum Facility siam vek a ni dawn a. Hei hian kawlphetha, tui in tur, inthiarna (toilet), ramp, Furniture, Approach Road, Mobile Connectivity leh Telephone (landline) leh a dangte a huam a. Sectoral Officer te chu Polling Station zawng zawng fang chhuak turin an zin kual mek a. Anni hian Polling Station zawng zawng hi chipchiar taka zirin Assured Minimum Facility awm kim lohna Polling Station hi thuam chak leh chei that an ni dawn a ni.
Nimin-a thutkhawm ah hian Serchhip SP MS. Dawngkima bakah Department hrang hranga hotute leh Ttelephone leh Internet Service Provider te an tel a. Inthlanpui atana thil pawimawh hrang hrangte sawiho a ni bawk.
Comments
Post a Comment