MUP Serchhip District Headquarters Assembly vawi 13-na Serchhip-ah neih a ni
MUP Serchhip District Hqrs. Assembly hi an President T. Lalrawngbawla chuan kaihruaiin he huna khuallian Dr. KC. Runremsangi chuan kan hnam zai leh lam te hi kan ngainep tur a ni lo tih sawiin, tunlai thalai ten kan Culture an vawnhim tha tawk tawh lo nia a hriat thu sawiin, kan hnam hla te pawh kan thalai te hian ngaihlu tawh lovin, hnamdang hla an ngaithla nasa tawh lutuk chu tha lo a tih thu a sawi a, kan hnam Culture vawnhim kawngah hian kum lama Upa ten theihtawp an chhuah zel a pawimawh thu sawiin, kum lama Upa kalkhawmte chu faina leh thianghlimna kawngah inthlahdah lo tur leh nitin nunphung kawng hrang hrangah thalai zawkte entawn tlak nih zel tum turin a chah bawk.
MUP Serchhip District Hqrs. Assembly-ah hian an pawl Secretary H. Lalchhuanmawia leh Fin. Secretary C. Lalbiakthanga te hnen atangin Report ngaihthlak a ni a, Member boral te sunna hun hmangin Rorelna hun an hmang a, an thurel zingah Serchhip-ah Social Welfare Officer dah thuai ni rawh se tih te; Tar Chawmna (Old Age Pension) buaipui leh enkawl MUP kut a dah te; Tar Chawmna leh a latu zah tihpun sak tura sawrkar-a thlen te leh Serchhip-a MUP Office nghaktu mumal zawk dah bakah MUP Serchhip District inenkawlna tur Budget siam te a tel a. Hemi hnu hian Serchhip District chhunga MUP Area hrang hrang ten lengkhawm zai-a intihsiakna neiin Area 5 tel zingah East Lungdar Area chu pakhatna an ni.
Nimin-a MUP Serchhip District Hqrs. Assembly-ah hian Serchhip District-a SVEEP Nodal Officer Lalnunmawii, DIPRO Serchhip chuan SVEEP Campaign hun hmangin MUP member Assembly hmangtute chibai bukin vote thlak theuh turin a sawm a. Election Commmission of India chuan Inthlanpui-ah kum upa te a ngaipawimawh thu te, vote an thlak ngei theihna tura ruahmanna siam a nih dan te a sawi a. Vote thlak pawimawhzia hriaa Lok Sabha Inthlanpui kan hmachhawn meka vote thlak ngei tur leh, an tu leh fate hnenah vote thlak pawimawhzia zirtirtu a tang turin a sawm a ni.
MUP District Headquarters Serchhip hnuaiah hian Area sawm (10) awmin Serchhip, Serchhip North, Serchhip South, Thenzawl, Bungtlang, Khawlailung, N. Vanlaiphai, East Lungdar, Lungpho leh Chhingchhip Area-ah an inthen a. Heng Area hnuaiah hian Branch hrang hranga inthen lehin Branch 66 an awm a. Member 6188 an awm mek a ni.
Comments
Post a Comment