Science leh Technology lama ngaih pawimawh thlen

Science Teachers Association (STAM) Mizoram chuan nimin khan Chief Minister Lalduhoma chu a Pisa-ah hmuin Science leh Technology lama Zoramin hma a sawnna tura an ngaih pawimawh thenkhat te an thlen.

STAM hruaitute hian Chief Minister hi lawmpuina thilpek hlanin aan thil ngaih pawimawh an thlen a. Central saworkarin Institution tha bik tura a duan leh Institute of National Importance hiala a puan, India ram pumah pawh 31 emaw chauh awm leh Mizoram in a neih ve NIT Mizoram chu hmasawnna mumal awm lovin kum 20 chuang a kal tawh niin an sawi a. NIT hmasawnna tura an mu tan ber Forest Clearance tihfel a pawimawh tak meuh thu thlenin, NIT, Mizoram hi zirlaite mai bakah kutthemthiam thil buaipuitu te leh entrepreneur te tana chenfakawm zirna In tha lehzual a nih dan tur te an thlen a ni.

Hei bakah hian Zoram Medical College (ZMC)-a Post Graduate Course hawn chungchang pawh Chief Minister hnenah hian thlenin, National Medical Commission (NMC) pawmpuina (full recognition) neih a nih veleh Post Graduate Course hi hawn theih a nih tur thu Chief Minister chuan a sawi a. STAM hruaitute chuan Mizorama Science and Technology lama kan Inpui ber, Directorate of Science, Technology and Innovation chu Department puitling-a hlankai tul an tih thu Chief Minister hnenah hian an thlen bawk a. Tun dinhmunah Department puitlinga hlankai theih anih chiah loh pawhin chak zawka hmala thei tura tihlen (Upgrade) ngei tul a tih thu Chief Minister chuan a lo hrilh bawk a ni.