SCDTTA Season Ending Tournament khelh tan a ni
Naktuk-a zawhfel hman tura rua-hman SCDTTA Season Ending Tournament hi Serchhip District Sports Committee Vice President Vanlalvuana chuan khuallian nia hawngin SCD-TTA ten Mizoram chhung mai bakah India hmar-chhak huamchhungah te hlawhtlinna an hmuh ta Media kaltlanga hriat tur a awm thin thu sawiin, lawmawm a tih thu leh an hlawhtlinna te chhuanawm a tih thu a sawi a. SDSC hnuaiah Sports Association 20 an awm thu sawiin, heng Association te hnenah hian sawrkar atanga Promotional Fund an hmuh te semchhuah thin a nih thu leh pawl in hma a lak nasat chuan he sum pawh hi an dawn tam thin thu sawiin, SCDTTA chu Association te zingah tanpuina dawng tam ber te zinga mi an nih thu a sawi bawk.
SDSC Vice President chuan zirna leh Sports chu kalkawp tur a nih thu pawh sawiin, Sports chu taksa leh taksa hriselna atana pawimawh a nih bakah mi thenkhat tan chuan eizawnna a nih theih thu a sawi a, amaherawh chu infiamna lama hlawhtlinna chang tur pawhin zirna lama theihtawp chhuah a pawimawh thu sawiin, zirna chu ngaih pawimawh bera nei turin he huna tel te chu a chah bawk a ni.
SCDTTA Season Ending Tournament hawnna hun hi an President VL. Hrilmawia chuan kaihruaiin tun Season chhunga an hmalakna leh an hlawhtlinna hrang hrangte Secretary i/c Information Lalpianmawia hnen atangin ngaihthlak a ni a, Secretary Laltlankima hnen atangin Technical Report ngaihthlak a ni bawk.
Tun tum Tournament-ah hian kum 10 hnuai-lam te inelna atanga tanin kum 45 chunglam inelna thlenga neih tur niin a pumpui-ah Category 14-ah inelna neih a ni dawn a, Player 91 telin nimin khan khel tanin naktuk-ah zawhfel tur a ni ang.
Comments
Post a Comment