Mizoram Lok Sabha Inthlanpui neih tur Eco friendly-a neih tum a ni - CEO

Thla thar April 19-a Mizoram in Lok Sabha Inthlanpui a neih tur chu Environment tana him ‘Eco Friendly’ a neih tum a ni a, Political Party te pawh Hman khat daih, Single Use Plastic hmanga siam Poster, Banner leh a dangte hmang lo zawnga hma la tura tih an ni.

Mizoram Chief Electoral Officer Madhup Vyas chuan tunhnaia thuthar thehdarhtute a kawmna ah Lok Sabha Inthlanpui neih tur hi Environment tana him ‘Eco Friendly’ a neih tum a ni tih sawiin, Election Commission of India chuan Political Party-te leh Candidate-te chu hman khat daih Plastic, Single Use Plastic atanga thil siam leh tawih thei lo hmanrua hmanga Campaign lo tur leh Environment tana him hmanrua chauh hmang turin a ngenin a beisei tih a sawi a. Political Party pawh Single Use Plastic hmanga siam Poster, Banner leh a dangte hmang lo zawnga hma la tura tih an ni tih a sawi a ni.

Mizoram CEO chuan Mizoram chu State Assembly Inthlan ah ramchhunga Voters turn out tha State 5 zingah tel mah se MP Inthlan ah erawh Vote tla a tha thin lo tih sawiin, Vote tla a that theih nan hmalak tlan a tul thu a sawi a. Kum 85 chin chunglam tan mahni In-a Vote thlak (Home Voting) tih theih a nih thu leh, Vohbik (Persons with Disabilities) pawh Polling Station pan thei lo tih tihchianna a awm chuan Home Voting a theih thu sawiin, an duhthlanna ah a innghat tih a sawi a. Sakhaw rinna avanga vote thlak lo thin te pawh Vote thlak tura ngenin, “Inthlan hi mipui tana thil pawimawh a nih vangin vote thlak thei apiang chu vote thlak vek turin kan sawm a ni,” a ti.

Tun tum Inthlanpui neih turah hian Constituency tinah Hmeichhe hlang enkawl leh Voh-bik hlang enkawl tur Polling Station pakhat theuh leh Model Polling Station pakhat tal siam tum a nih thu CEO chuan a sawi bawk a, Commission thupek angin Critical Polling Station zawng zawngah leh Polling Station zawng zawng zatve aia tlem lovah Vote thlak lai vil turin Webcasting tih tum a ni tih a sawi bawk.