Vawiin-a Mizoram State Day pualin Governor in Zoram mipuite chibai a buk

Vawiin February 20, 2024 (Thawhlehni) hi Mizoram State Day a ni a, sawrkar Pisa chawlh a puan a nih angin sawrkar Pisa leh zirna In te khar a ni ang.

Vawiin-a Mizoram State Day lawm tur pualin Larsap Dr. Hari Babu Kambhapati chuan Zoram mipuite chibai a buk a, Mizoram State Day puala thuchah a sawina ah Larsap chuan, Ek Bharat Shreshtha Bharat in a tum angin Zoram mipuite chu khaw hawi tizau a, midangte khawsak phung hriatthiam sak turin a chah a, mahni hnam ziarang hloh chuang lovin State danga chengte nundan leh tihdan phungte pawh hrethiam a zah sak chunga khawsak thiam a ngai a ti a, Mizote nundan leh hawiher te hi India rama State ralmuang bera cheng tih atan mawi a ni tur a ni tih a sawi bawk. Larsap chuan Sawrkar laipui Scheme Ek Bharat Shreshtha Bharat chuan State hrang hranga chengte inhriatchian theihna turin program tha tak tak a siam tih sawiin, India rama cheng hnam hrang hrangte an inpawh zawk a, an inhriatchian tawn leh an inlaichinna te a lo ngheh zual zel chu a thil tum pawimawh ber a ni tih a sawi a, tu pawh inpawhtlang taka awm turin a duh tih a sawi bawk. 

Governor chuan kum 1986 June 30 khan Central sawrkar leh MNF inkara inremna Mizoram Peace Accord avangin Mizoram chu State puitlingah hlankai niin he remna thuthlung pawimawh tak chuan kum 20 chuang rambuai chu a titawp a, kum 1987 February 20 khan Mizoram chuan State puitling angin kawng engkimah bul a tan tih sawiin, Peace Accord avang hian Mizoram chu Central Sawrkarin State a pe tih hriat a pawimawh hle, a ti a, Mizoram chu an intiamna te rinawm taka vawng tlatin kum 37 chhung chu State ralmuang ber a ni mek tih a sawi bawk.

Kum 1966-a MNF ten zalenna suala Mizoram chu rambuai a nih hnuah June 30, 1986-a India sawrkar leh MNF-te'n inremna thuthlung an ziah angin Mizoram chu State puitlinga hlangkai turin ruahmanna siam a ni a; August 7, 1986-ah State puitlinga Mizoram hlankaina tur Bill chu Lok Sabha-ah pharh niin member 310 zinga 308-in an thlawp a. Rajya Sabha-ah pawh member 171 zinga 160 in thlawpin an pass leh a; August 14, 1986-ah India President-in hming a ziah hnan hnuah 53rd Constitution (Amendment) hnuaiah Mizoram chu India rama State 23-na a ni ta a ni. Feb. 20, 1987 khan khatih laia Prime Minister, Rajiv Gandhi chuan Aizawl Lammual-ah Mizoram State nihna chu a puang a; February 20, 1987-ah Raj Niwas-ah Mizoram Lt. Governor ni lai chu Mizoram Governor atan lakluh niin Chief Minister atan Laldenga bakah Minister atan Zoramthanga, Rualchhina leh Tawnluia te rinawmna thu tiamtira lakluh nghal an ni bawk.