State 2 dincham lawmna nei

Mizoram Governor Dr. Hari Babu Kambham-pati chuan nimin tlai khan Raj Bhavan Durbar Hall-ah Mizoram leh Arunachal Pradesh State-te pualin Foundation Day lawmna hun a buatsaih.

'Ek Bharat Shreshtha Bharat' hmalakna hnuaia heng State pahnih dincham lawmna hunah hian Governor Dr. Hari Babu Kambhampati chuan kum 37 kaltaah Mizoram leh Arunachal Pra-desh-te chu India ram State 23-na leh 24-na atana puan a nih thu sawiin, kum 20 dawn rambuai a nih hnuah June ni 30, 1986 a Sawrkar laipui leh Mizo National Front te'n inremna thuthlung Peace Accord ziakin hemi hnu February ni 20, 1987 ah Mizoram chu State puitlinga hlankai a ni, a ti a. State a nih hmain harsatna hrang hrang tawk bawk mahse tuna pawimawh ber chu India ram State zinga ralmuang ber a ni thei hi a ni, a ti bawk.

British rorelna hnuaia awm hun ata tawh kum 1972 thlengin Arunachal Pradesh chu North East Frontier Agency (NEFA) ti a vuah nih thu leh hemi kum January ni 20, 1972-ah Union Territory-a hlankai niin Arunachal Pradesh ti a thlak a nih tak thu Governor chuan a sawi a. State of Arunachal Pradesh Act, 1986 hmangin India State 24-na ni turin February 20, 1987-ah State puitling a hlankai a nih thu sawiin, State mawi tak, ecology hausa tak a nih thu a sawi bawk.

Ek Bharat Shreshtha Bharat programme hian India rama State leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. Kum 2023 June thla atang khan State leh UT dincham lawmna hi buatsaih thin a ni.