Health Care Bill ba la awm cheng vbc. 45.59; tun sawrkar kum-ah rulh vek tum a ni

Mizoram sawrkar-a Health Minister Lalrinpuii'n Health Care Bill ba cheng vbc 45.59 chuang rulh nana SEDP sum cheng vbc 40 ruahman sa hmangin Bill ba te tun sawrkar kum chhunga pekchhuah tum a nih thu a sawi.

Mizoram Legislative Assembly Budget Session neih mekah kar hmasa Ningani khan Health Minister Lalrinpuii chuan Tuirial bialtu MLA K. Laldawngliana zawhna, SEDP sum vbc. 150 atanga Health Care Bill tur vbc. 40 dah hran semchhuah a ni tawh em tih chu chhangin, semchhuah a la ni lo tih a sawi a, tun sawrkar kum chhunga pekchhuah tum a nih thu a sawi a, Health Care bill ba hi an ngaih pawimawh avangin Chief Minister-in Health Care atan cheng vbc. 15 a pechhuak tawh tih a sawi a ni. RTI hmanga zawhna Health Department in an chhanna atanga a lan danin Mizoram State Health Care Scheme hnuaiah February 19, 2024 thleng khan damlo bill bat 13,053 awm mekin bill bat tlingkhawm hi Rs. 45,59,61,743 a ni a, Sawrkar thar a pian hnu (December 4, 2023)-ah January, 2024 khan damlo mi 5,026-te bill pekchhuah tawh niin pekchhuah zat hi Rs. 14,99,98,817 a tling a. MHCS leh AB-PMJAY te chu thlunzawm tum niin sawrkar thutlukna nghah mek a ni tih tar;am a ni bawk.

Dampa bialtu MLA Lalrintluanga Sailo zawhna House-a chhan hman loh, ziaka a lan danin, Health Minister chuan Sawrkar hmasain Health Care atana Asian Development Bank (ADB) atanga loan cheng vbc. 1000 lakna tur a tihfel tep tawh chu nikum MLA inthlan in a tih khaihlak avanga hmalak a nih mek laiin, Asian Development Bank lamin kumin India ram pum inthlan neih zawh hnu, June thla a Loan Sign turin an hmachhawp tih a sawi bawk.

Hei bakah hian zawhna dang chhangin Health Minister Lalrinpuii chuan Mizoram Public Service Commission (MPSC) kaltlanga Doctor lak tumna a awm thu a sawi a, Specialist 7 leh Medical Office 9 lak tum a ni tih sawiin, tun dinhmun ah Mizoram-ah CT Scan tih theihna chu hmun 4-ah a awm thu leh Aizawl Civil Hospital, ZMC, Mizoram State Cancer Institute leh Lunglei Civil Hospital-ah te CT Scan tih theih a ni tih a sawi a. MRI tih theihna erawh ZMC-ah chauh a awm thu sawiin, Aizawl Civil Hospital-ah Smart City kaltlangin MRI tih theihna tura ruahmanna kalpui mek anih thu te pawh a sawi bawk a ni.