Mizoram Excise & Narcotics Manual angin transfer leh posting kalpui a ni dawn - END Minister

Excise & Narcotics Department (END) Minister Lalnghinglova Hmar chuan Mizoram Excise & Narcotics Manual angin transfer leh posting kalpui a ni dawn tih a sawi.

Kolasib-a END Assistant Commissioner Office chu Inrinni khan END Minister Lalnghinglova Hmar hian tlawhin Recreation Hall-a thawktute nen inkawmna an neih ah ruihhlo dona kawngah thawhho that a pawimawh tih sawiin, thawktute chu thawhhona tha nei zel turin a chah a. Mizoram Excise & Narcotics Manual angin transfer leh posting kalpui a ni dawn tih sawiin, thawktute chu lo inring lawk turin a chah a; sawrkar hnathawk tan awm duhna bik emaw, awm duh lohna bik emaw neih a rem lo tih sawiin, mahni awmna apiangah thahnem ngai taka thawk turin a chah a. Zu leh ruihhlo hluar zel leh chumi avanga thi leh HIV vei pung zel tiziaawm turin a tha zawnga danglamna thlen a ngai tih sawiin, chumi kawnga ram siamthat hna thawhnaah tang tlang turin thawktute chu a sawm a ni.

Lalnghinglova Hmar chuan sawrkarin ruihhlo do leh ruihhlo in a tihbuaite chhanchhuahna lam a ngai pawimawh tih sawiin, hemi kawngah hian END chuan mawhphurhna lian tak an nei tih a sawi a. Thawktu indaih-lohna tiziaawm tura sawrkar hma lakna kalpui mek a nih laiin, ruihhlo a hluar zel bawk si avangin indaih hun nghah hman a ni lova, thawktu awm ang angte'n mahni inring tawk tak chunga thahnem ngai taka thawh sauh sauh a pawimawh thu a sawi bawk.

Minister hian Kolasib Press Club pawh tlawhin MJA Member te nen an inkawm nghal a, Minister dinhmun chu nihna ang chuan thil lawmawm tak ni mah se, mawhphurhna ang zawng chuan thil huphurhawm tak nia a hriat thu sawiin, a Department chan hnuaia hmalakna leh ruahmanna hrang hrangte tarlangin, Sports Infrastructure siam belh aia a awmsa hmang tangkai a, infiammite tihhmasawn tum a nih thu te; LESDE kaltlanga thalaite tana hna tam zawk siam belh tura hmalakna tur ruahman a nih thu te; 'Bana kaih' Policy chak taka bawhzui tum a nih thu te; ruihhlo dona kawng leh ruihhlo ngaite chhanchhuahna kawnga nasa zawka hma lak tum a nih dan te a sawi a. Journalist-te chu mipui nena innghenga hna thawk, thil hrang hranga tawnhriat nei an nih angin theihtawpa thawhpui turin a sawm a ni.

Kolasib Sports Stadium-a Kolasib District Football Association (KDFA) First Division League 2023/24 kharna hun pawh END Minister hian hmanpui nghalin, ‘Eng hna pawh thawkin, eng kawng pawh zawh ila, kan thil tih tumin hmasawnna lam hawi se' tih chu a thil ngaih pawimawh a nih thu a sawi a, eizawnna tlak a nih hriaa tih takzeta Football khel turin thalaite chu a chah bawk a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni