Kum 2024-2025 atana Mizoram Budget ruahman cheng vbc. 14,412.12 chu House-ah pharh a ni

Assembly Budget Session neih mekah nimin khan Finance changtu Chief Minister Lalduhoma chuan kum 2024-2025 chhunga Mizoram sawrkar budget cheng vbc. 14,412.12 chu a pharh a, kum kal mek 2023-2024 a Mizoram Budget aiin cheng vbc. 202.17 (1.42%) in a tam zawk a. Revenue surplus cheng vbc. 564.95 awm tura beisei a ni.

Kum 2024-25 Mizoram Budget Estimate Chief Minister Lalduhoma'n a pharh takah hian sum hmuh tura beisei, Receipt Estimate leh hman ral tur beisei, Net Expenditure Estimate chu cheng vbc. 14,412.12 ve ve niin Mizoram sum hmuh tura beisei hi kum kal mek-a ruahman cheng vbc. 14,209.95 aiin cheng vbc. 202.17 in a tam zawk a, Revenue surplus cheng vbc. 564.95 awm tura chhut a ni a, hei hi State Sawrkar sum thawhchhuah, Gross State Domestic Product (GSDP) atangin zaa 1.18 a ni. Sum indaihlohna avanga sawrkar-in sum a puk tur, Gross Fiscal Deficit chu cheng vbch. 1,365.70 ni tura ruahman a ni a, hei hi GSDP atangin zaa 2.84 a ni a, Sawrkar kum thara Sawrkar leiba tlingkhawm, Projected Liabilities chu cheng vbc. 14,034.76 ni tura chhut a ni a, Sawrkar leibat tur hi GSDP atangin zaa 29.22 a ni a, sawrkar kum kal mek 2023-24-a Sawrkar leiba zat GSDP atanga zaa 37.84 aiin, zaa 8.62 in a tlem zawk a ni.

Mizoram sawrkar-in sum a thawhchhuah tura beisei chu Chhiah, State's Own Tax Revenue atangin cheng vbc. 1,312.42 leh Non-Tax Revenue-ah cheng vbc. 1,122.39, a vaiin cheng vbc. 2,434.81 a ni a. State's Own Tax Revenue atanga sum hmuh beisei hi sawrkar kum kal mek a hmuh beisei aiin cheng vbc. 228.12 in a tam zawk a, Non-Tax Tevenue-a cheng vbc. 1,122,39 hmuh beisei chu kum kal meka hmuh beisei aiin cheng vbc. 225.4 in a tam zawk a. Sawrkar sum puk tur zat ruahman chhin chu cheng vbc. 1,992.03 niin, hei hi kum kal meka sum puk tura ruahman chhin aiin cheng vbc. 679.69 in a tlem zawk a. Hetah hian Scheme for Financial Assistance to States for Capital Investment (SASCI) hnuaia kum 50 hnua rulh tur a pung awm lo, interest free loan cheng vbc. 500 te, Market Borrowing-ah cheng vbc. 1,170 leh NABARD hnuaia Rural Infrastructure tihchangtlunna tur cheng vbc. 250 leh SIDBI hnuaia Cluster Development Fund atangin cheng vbc. 30 puk turte a tel a ni.

15th Finance Commission in Sawrkar laipuiin Chhiah chi hrang hrang a hmuh atanga zaa 41 chu State hrang hrangte insem turin a ruahman a, heta tanga Mizoram chan tur chu zaa 0.5 a ni a, kum kal mekah Sawrkar laipuiin chhiah a hmuh atanga Mizoram sum hmuh tur hi Budget Estimate-ah cheng vbc. 5,107.25 a ni a, hei hi Revised Estimate-ah zaa 8.13 a pungin, Mizoram sum hmuh zawng zawng chu cheng vbc. 5,522.48 a ni a. Sawrkar kum thar 2024-25-ah chuan Share of Taxes atanga Mizoram sum hmuh tur hi cheng vbc. 6098.93 ni tura ruahman a ni.

Hei bakah hian Post Devolution Revenue Deficit Grant-ah cheng vbc. 1,079 hmuh beisei a ni a, hei hi Sawrkar kum kal mek-a hmuh cheng vbc. 1,474 aiin cheng vbc. 395 in a tlem zawk a, hei hi a chhan chu Sawrkar laipuiin State Sawrkar te chu mahni intodelh tura a beisei vanga kumtin sum a pek thin a tihhniam hret hret vang a ni a, 15th Finance Commssion rawtna ang chuan kum 2025-26-ah chuan cheng. vbc. 586 chauh a ni dawn a ni.

Urban Local Body Grant atanga sum hmuh tura ruahman chu cheng vbc. 39 a ni a, Rural Local Body Grant-ah cheng vbc. 76, State Disaster Risk Management Fund-ah cheng vbc. 54 leh Health Grant-ah cheng vbc. 34.51 hmu tura ruahman a ni bawk.

Mizoram Budget Estimate zinga cheng vbc. 1,235.27 hi Charged Expenditure niin, House-in a remtih kher ngai lova hman theih a, vbch. 13,176.85 chu Voted Expenditure niin hei hi hman a nih dawn chuan House in a pawmpui a ngai thung a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni