Langtlang leh rintlak taka sum leh pai enkawl ngaih pawimawh hmasak a ni dawn - Chief Minister

Chief Minister Lalduhoma chuan langtlang leh rintlak taka sum leh pai enkawl an ngaih pawimawh hmasak dawn thu a sawi.

Nimin-a Mizoram Legislative Assembly Budget Session-a sawrkar kumthar 2024-2025 atana Mizoram Budget pharh paha thu a sawi ah Chief Minister Lalduhoma chuan Budget an buatsaih laia an ngaih pawimawh ber chu Zoram mipuite tana ei leh bar zawnna kawng tlo leh nghet zawka buatsaih a nih thu sawiin, “Chumi tihlawhtling tur chuan langtlang leh rintlak taka sum leh pai enkawl hi kan ngaih pawimawh hmasak tur a ni. Sum te hian mipuite a thleng ngei a ni tih leh tangkai taka hman a ni ngei tih ve finfiah kan tum tlat,” a ti a. November 30, 2023-a Revenue leh Capital Head atnga an hmuh chin chu cheng vbc. 6,378 a nih thu sawiin Lalduhoma chuan, “Hemi hun chhung veka kan sum hman chhuah chu cheng vbc. 6,925 a ni a, kan leiba tlingkhawm chu cheng vbc. 12,966.93 a ni,” a ti a, November 30, 2023-a RBI State Account-ah Minimum Balance awm tur a awm loh avangin Ways & Means hmanga sum puk a nih thu a sawi bawk.

Chief Minister Lalduhoma sawi danin, Pension leh Retirement Benefit dangte State Treasury hrang hrang hnuaia pek chhuah loh la awm zat chu cheng vbc. 238.13 a ni a. Sum leh pai dinhmun derthawng taka kan awm avangin ngai awh chho leh turin 'Year of Consolidation' puan loh theih a ni lo tih sawiin Chief Minister chuan, “Mipuite beiseina ti hlawhtling turin kan inbuatsaih mek. Kan sawkar chu hmasawnna rualkhai, ngelnghet siam tur te, kan chhehvela ramngaw leh nungchate humhalh chung sia hmasawnna hnathawk turin a inbuatsaih mek,” a ti.

Lalduhoma chuan hmelhma kumhlun hlemhletna theihtawpa do turin an inbuatsaih mek tih pawh sawiin, “Hemi atana hmanraw hrang hrang Social Security lama hmalakna te, ram leilung humhalh te, Entrepreneurship leh Skill Development-te mumal taka kalpui tura in ruahman a ni,” a ti a. Insawhnghehna kum puan a nih avangin nasa taka leiba tihhniam tum a nih thu pawh sawiin, kum 2024-25 chhunga sum puk tur chu Rs. 697,69,00,000 a tihhniam a nih dawn thu leh Thlai thar thlan bik chi 4 leina tur dah a nih thu a sawi bawk.