Serchhip Town in Khawpui Fai ber lawmman a lak lawmna Bawrhsap hovin neih a ni

Kum 2023-a Mizoram Khawpui Fai inelna, Mizoram Cleanliness Competition 2023-a District Hqrs. zinga Fai ber lawmman Serchhip Town in a dawn lawmna chu nimin khan neih a ni a, he hun hi Serchhip District Bawrhsap David Lalthantluanga chuan hmanpuiin Town chhunga VC hrang hrangte hnenah lawmman a hlan bawk.

Serchhip DC Conference Hall-a Serchhip Town in Khawpui Fai ber lawmman a lak lawmna ah hian Serchhip District Bawrhsap David Lalthantluanga chuan District khawpui zinga Serchhip Town in Fai ber lawmman a la chu lawmawm a tih thu sawiin, inelna hrang hranga pakhatna lawmman lak chu a lawmawm mai bakah Faina kawnga lawmman pakhatna lak chu a lawmawm lehzual tih a sawi a. He inelna ah hian Tehfung hrang hrang hmanga khawpui chhung enfiah a nih thu sawiin, khawpui chhung leh a vel faina bik chu he inelna tehfung lian ber a nih bakah khawpui chhunga inthiarna hmun hrang hrang te, bawlhhlawh thliar hran dan te, bawlhhlawh paih dan te, Zirna In hrang hranga faina leh thianghlimna kalpui dan te leh khawpui cheimawi te thlengin he inelna hian a ngai pawimawh em em tih a sawi a; chutiang inelna hautak a Serchhip Town in pakhatna lawmman a dawng thei chu chhuanawm a tih thu sawiin, hemi atana hma latu Serchhip-a UD&PA Department te, VC leh NGO zawng zawngte leh faina kawnga nasa taka hmala tute chungah lawmthu a sawi a. Tha thlah lova tan kan lak chhunzawm zel a ngai tih a sawi bawk.


District Bawrhsap chuan bawlhhlawh tawih thei leh tawih thei lo thliarhran (Waste Segregation at Source) chungchang sawiin, he hmalakna hi Serchhip-ah kalpui ve thuai a ngai dawn tih a sawi a. Central Sawrkar in a ngaih pawimawh em em Solid Waste Management Centre pawh neih a tul dawn thu leh hemi kawnga D&PA hmalakna zel turah mipui leh sawrkar tanrual a ngai dawn hle tih a sawi a. Khawpui chhung bikah tuihawk luankawr leh a khuhna mumal zawka siam a tul thu leh khawtlang hruaitute chu ngaih pawimawh hmasaka neih tura a duh thu sawiin, sum hnar hrang hrang atang ten a siam dan kawng dap zel turin a ngem a. Kawngsir leh kawng dunga bawlhhlawh chhekkhawlna hmun (Garbage Vulnerable Points) te pawh kalsan hret hret a, a nei lo awmchhun khawpui fai tak nih tum turin mipuite chu a chah bawk a ni.

Serchhip in Mizoram-a khawpui fai ber lawmman a lak lawmna hun hi Serchhip District Urban Development Officer (DUDO) Gaston Vanlalhriatpuia chuan kaihruaiin Serchhip Addl. DC James Lalnithanga chuan inlawmna thu sawiin, Mizoram khawpui Fai Inelna kalpui a nih dan te a tarlang a. Nikum-a Mizoram Khawpui Fai inelna neih a Serchhip Town in endikna hrang hrang a hmachhawn dan te Serchhip DUDO hian tarlangin, Serchhip Joint VC Chairman C. Vanlal-siamthara pawhin thu a sawi bawk a ni.

Mizoram Cleanliness Competition 2023 hi Category thum-ah then a ni a. Aizawl leh Lunglei Municipal huamchhunga Ward hrang hrang te chu Category I-ah dahin Category II-ah District Headquarters pakua te an inel a, Serchhip hian lawmman pakhatna dawngin Khawzawl leh Siaha Town chuan ten an dawt a. Category III-ah Notified Town 17 te inelin hetah hian Biate Town chu Pakhatna niin Phullen leh Ngopa ten an dawt a, February 16, 2024 khan inelna lawmman te hi semchhuah a ni.

Mizoram Khawpui Fai Inelna hi India rampum-a Faina kawnga inelna, Swachh Survekshan inbuatsaihna atana kalpui a ni a, tehfung hrang hrang 10 hmangin khawpui te hi endik a ni a, Swachh Survekshan atan hian kumin October thla khian khawpui hrang hrangte hi endik a ni leh dawn a ni.

Serchhip in khawpui fai ber lawmman a lak lawmna hunah hian Serchhip Town chhunga VC 14 te chu an hmalakna a lawmthu sawina atan Rs. 10,000/- theuh hlan an ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni