Damdawi hmanga chiah sa Thosilen Mizoram hmun hrang hrangah sem leh a ni dawn

Mizoram hmun hrang hranga semchhuah tur damdawi hmanga chiah sa Thosilen chu Inrinni khan Aizawl atangin vailiam a ni a, kumin March-April inkar hian Mizorama District 9-ah te mipui hman theih tura sem zawh hman tura hmalak mek a ni.

Damdawi hmanga chiah sa heng Thoseilen, Long Lasting Insecticidal Nets (LLIN) te hi Malaria laka invenna tur atana Global Fund (Global Fund to Fight AIDS, Tuberculosis and Malaria) sum bultuma National Vector Borne Diseases Control Programme (NVBDCP), Govt. of India kaltlanga hmuh niin Mizoram tan 4,14,197 pek a ni a. Heng te hi Health Minister Lalrinpuii chuan Aizawl atangin a vailiam a, ‘Damdawi chiah thosilen’ sem chuan Malaria tihtlem kawngah awmze thui tak a neih ngei a beisei thu sawiin, Malaria natna umbo tura India sawrkarin kawng hrang hranga hma a lak tawh dante leh Mizoram-ah pawh National Health Mission hnuaiah State Vector Borne Disease Control Programme (SVBDCP) ten ngawrh taka hma an la thin chu lawmawm a tih thu a sawi bawk.

LLIN thosilen hi kum dangah pawh sem thin lo ni tawhin, kumin March-April inkar hian Mizoram-a District 9-ah te mipui hman theih tura sem zawh hman tura hmalak mek a ni a. Khaw tinah sem lovin Malaria tamna khuaah te sem tura ruahman a ni a, NVBDCP-in sem dan tur a ruahman anga sem tur niin Thosilen dawng tur khua te chu Sub-Centre khua, kumkhat chhunga mi 1000 zel atanga chhuta Malaria vei mi pakhat leh a aia tam awmna (API more than 1) khuaah te sem a ni dawn a ni. LLIN hi size hrang pathum (3) a awm a, chhungkaw member zat mil zela sem a ni ang. He thosilen hi damdawi-ah chiah sa a nih angin a damdawi that hun chhung (expiry) hi kum 3 a ni. Thosilen hi a dawngtu mipui ten a hmanna tur dik takah an hmang ngei tur a ni a, tihral emaw, lui lam sa man nan emaw a hman phal a ni lo tih thuneitute chuan an sawi a ni.

Mizoram hi Malaria chenchilh ram a la ni a. Tun dinhmunah India ramah mi 1000 zel atanga Malaria vei hmuhchhuah zat atanga chhutin India rama Malaria tamna ber State nihna kan hauh mek a ni. Nikum (2023) January - December chhung khan Malaria vei nia rinhlelh thisen exam zawng zawng zat 3,34,100 niin Malaria vei hmuhchhuah mi 17,988 an awm a, nunna chan mi 13 an awm bawk.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni