Mizoram State Day vawi 37-na Serchhip-ah Bawrhsap hova hman a ni

Mizoram State Day vawi 37-na chu nimin khan Mizoram hmundangte rualin Serchhip-ah pawh hman a ni a, he ni pual hian Serchhip DC Conference Hall-a hun hman a nih hnuah Serchhip Auditorium-ah ram tana tawngtai rualna hun, ‘State Day of Prayer” chu State Day of Prayer Committee buatsaihin hman chhunzawm a ni bawk.

Serchhip DC Conference Hall-a Mizoram State Day puala hun hman hi Serchhip Addl. DC James Lalnithanga chuan kaihruaiin he hun hmanpuitu Serchhip District Bawrhsap David Lalthantluanga chuan State puitlinga hlankai kan nih hnuah Mizoram in hmasawnna tam tak kan hmuh thu a sawi a, kum engemaw zat State ralmuang ber dinhmuna kan ding chho thei chu lawmawm a tih thu sawiin, “State nihna hi kan ngaihhlut thiam a, ralmuanna kawngah chauh lo pawh State dangte tana entawn tlaka inpho chhuah kan tum zel a pawimawh a ni,” a ti. Kum 37 zet State puitling dinhmuna kan din hnuah hmasawnna tur erawh kan la ngah hle tih pawh Bawrhsap chuan sawiin, taima taka hna kan thawh a, dik leh rinawm taka thil kan tih phawt chuan intodelh tur leh tun aia chak zawka hmasawn tur hian theihna kan nei a ni tih hre turin kalkhawmte a chah a. Sawrkar hnathawk te mai bakah tlawmngai pawl, Kohhran, Political Party, Chanchinbu mite leh mimal tin ten kan hma zawna mawhphurhna leh theihna kan neihte ram tan thahnem ngai taka hlenchhuak a; taimakna, rinawmna leh dikna nen ram leh mipuite hmasawn nana atana tan la zel turin a fuih a ni.

Serchhip DC Conference Hall-a Mizoram State Day puala hun hman a nih hnu nimin chhun dar 12:00 khan Serchhip Auditorium-ah State Day of Prayer Committee in a lo ruahman tawh angin ‘State Day of Prayer’ hman zui nghal a ni a. Hemi puala hun hman hi chhawng thum-ah then niin a hun hmasa ber leh a hawnna hun hi Serchhip District Bawrhsap leh State Day of Prayer Committee Patron David Lalthantluanga hian hmanpuiin State puitlinga hlankai kan nih dan leh Pathian malsawmna avanga tun dinhmuna ding thei kan nih dan te, kum dang ang lo taka he ni ram tana tawngtai rualna hun atana hman ni se tia rawtna lo chhuah dan te a sawi a. Sual thupha chawina, inhlan tharna leh Pathian hnena lawmthu sawina hun a nih ang ngei a thinlung leh tihtakzeta Pathian pawlna hun hmang turin kalkhawmte a chah a ni.

Serchhip Auditorium-a hun hman hi a hun hmasa ber chu Rev. Laltanpuia Colney (BCM) chuan kaihhruaiin ‘Sual ngaihdam dilna’ tih thupui hmangin tawngtai rualna hun an hmang a, Pastor C. Lalchhuanga (UPC NEI) chuan thuchah tawi a sawi a. A hun hnihnaah hian ‘Pathian hnena lawmthu sawina” hun hman niin Rev C. Lalneihthanga (Isua Krista Kohhran) chuan programme a kaihruai a, Pastor Challiandinga Hnamte (Seventh Day Adventist) chuan thuchah tawi a sawi a. A hun thumna leh kharna hun hi Rev. Rolungmuana Zadeng (Presbyterian) chuan kaihruaiin tawngtai thupui atan ‘Inhlantharna/Inpumpekna’ tih chu hman a ni a, Capt. Vanlaltharzuala (Salvation Army) chuan thuchah tawi a sawi a. A tawp kharnaah hian State Day of Prayer Committee-a Working Chariman leh Serchhip sub-Hqrs. YMA President Kawlthuama chuan thu a sawi bawk a ni.