State Commission for Women in thubuai dang ziaklut leh

Tunhnaia Social Media kaltlanga mipat hmeichhiatna hmang lai tihchhuah thar chungchang ah Mizoram State Commission for Women chuan thubuai thar a ziaklut.

Nimin-a hriattirna thar a tihchhuah ah Mizoram State Commission for Women chuan, tun thla ni 9 khan Social Media-a mipat hmeichhiatna mawi lo taka hmanga in pholan chungchangah thubuai ziaklut a, an ngen anga Cyber Crime Police-in a mawhphurtute an man hnu lawkah Mizo hmeichhia ni ngeia lang pakhat chuan Instagram Account pakhat ‘zan_lalnu.03’ tih hmangin mipat hmeichhiatna hmang lai live-in a tichhuak leh a, a hnuah hian Instagram account chu thlak danglam zui ni-a a lan thu a sawi a.

Hetiang thubuai sawi hlawh tak a awm mek laia a hmaa mi ang bawk thil a thleng leh hi Mizoram State Commission for Women chuan pawi a ti takzet tih sawiin, Mizo mipuite, a bikin hmeichhiate chu hetiang lam kaihhnawiha inhnam-hnawih tawh lo tur leh dan bawhchhe zawnga khawsa tawh lo hram turin a ngen a, ‘zan_lalnu.03’ kaltlanga mipat hmeichhiatna mawi lo taka pho-langtu hi chhui chhuak a, hremna a hmuh ngei theih nan a rang thei ang bera dan anga hma la zui turin Cyber Crime Police chu a ngen a, an hmalak dan kimchang chu ni sarih chhunga Mizoram State Commission for Women hnenah ziaka hriattir leh turin a ngen bawk a ni.