Budget-ah hmasawnna hna thawhna tur a pung

Chief Minister Lalduhoma chuan kum 2024-2025 chu sum renchem, sum dinhmun insawh nghehna kum a ni tih sawiin, chuti chung chuan hmasawnna hnathawh tur erawh a pun tho thu a sawi.

Kum 2024-2025 atana Mizoram Budget nimin-a Assembly House-a a pharh hnua Assembly House Annex Building, Conference Hall-a thuthar thehdarhtute a kawmna ah Chief Minister Lalduhoma chuan kum 2024-2025 sawrkar inrelbawlna atana hman tur awm zat, Revenue Expenditure chu cheng vbc 14412.2 a nih thu leh hmasawnna hnathawh tura sum ruahman chu cheng vbc. 2455.08 a nih thu sawiin, Sawrkar Flagship Progamme, Bana kaih (Hand Holding policy) hmanga ram chhunga kuthnathawk te tihmasawnna turin cheng vbc. 200 ruahman a nih thu leh he Policy kaihnawih Department te chu an Scheme leh Proposal te azirin sawkarin a tul angin sum a pe dawn tih a sawi a. An sawrkar tirhah thlai leinana an dahhran cheng vbc. 10 nen belhbawmin Bana kaih Policy atan hian avaiin cheng vbc. 310 a awm tak thu a sawi bawk.

State chhunga tharchhuah a tlem avangin hemi kawnga hmalakna atan Stamp Duty hnuaia rate hman lai ram hlutna chu zaa 1 atangin zaa 3-ah an tisang dawn tih sawiin, Cabinet-ah pass tawhin hmeithai leh hmeichhe harsa zawk te tan Stamp Duty chu zaa 2-ah dah a ni tih a sawi a. Thingtlang mi khawsak harsa zualte khawpuia an boralin an ruang phurh hawnna atan cheng vbc. 5 ruahman a nih thu leh ruihhlo dona kawnga hmalakna atan cheng nuai 50 dah a ni tih a sawi bawk.

Chief Minister chuan Healthcare lama indaihlohna phuhruk nan sawrkar kumtharah cheng vbc. 20 dah anih thu sawiin, sawrkar kum hman meka Healthcare ba rulh nan cheng vbc. 40 chu Revised Estimate ah dah a ni tih a sawi a, inkalpawhna kawngpui leh leidawh thawmthat ngaite thawmthat nan cheng vbc. 100 dah a ni tih a sawi bawk.

Electric bill tihsan tumna a awm loh thu Chief Minister chuan sawiin, sawrkar chuan eng chhit man ti sang si lova Power Supply tihpun dan tur kawng zawn a tum dawn thu leh mumal zawka hmalakna a awm theih nan cheng vbc 20.13 an dah tih a sawi a. Cheng vbc.h 607.09 chu Mizoram chhunga Autonomous District Council (ADC) pathum te dawn turin ruahman anih thu leh heta tang hian cheng vbc. 424.22 chu Share of Ttax angin a kal anga, cheng vbc. 182.87 chu Deficit Grants angin a kal dawn a ni.

Chief Minister chuan kum 2024-25 inkara sawrkar sum puk tur zat ruahman chhin chu cheng vbc. 1992.03 a nih thu leh CSS sum doletna tur Counterpart Funding atan cheng vbc. 250 dah a nih thu a sawi a. Mizoram Budget-ah a vawi khatna atan hmeichhe dinhmun chawikan nan Gender Budget siam a ni tih a sawi bawk.