State Resource Mobilisation Committee thukhawm

Mizoram State Resource Mobilisation Committee thutkhawm chu Inrinni khan an Chairman leh Chief Minister Lalduhoma hovin CM Meeting Room-ah nei a ni.

Mizoram State Resource Mobilisation Committee thutkhawm ah hian an hmalak dan tur hrang hrang sawiho niin Chief Minister chuan, sawrkar hmasaah khan Resource Mobilisation Department anga din tumna a awm thu leh sum leh pai renchem a ngaih avangin Department thar din lam aiin a awmsa te pawhkhawm (amalgamate) hial chu an rilruah a awm zawk tih a sawi a. Committee anga kalpui theih nia a lan avangin an kalpui ta zawk tih a sawi bawk. Chief Minister chuan Sawrkarin sum leh pai hnar tam zawk a neih theih nana hmalakna tur awm te an dap dawn tih sawiin, “Tunah pawh Stamp Duty lamah bul kan han tan a, India rama Stamp Duty la hniam ber te zinga mi ni chungin tlema tihsan hlek a ni. Inrenna lam te, sawrkar hnathawkte rel felna te, Dis-Investment lam te, Outsourcing lam te, Chhiah hmuhbelh theihna te leh a tul anga Administrative Reforms thlengin kan hma chho dawn a. Kan kal chak theih nan Sub-Committee insiam te pawh a tha hial ang,” a ti bawk.

Mizoram State Resource Mobilisation Committee-ah hian Chief Minister chu Chairman niin Vice Chairman-ah Haukhuma Hauzel leh Member Secretary-ah Ramchuana te an ni a. Thutkhawm hmasa ber hi inhmel-hriatna atan hmangin an hmalak tawhna te an sawiho bawk a. Member ten hmalak theihna awm nia an ngaih thilte inpawh tlang taka sawiho in Chief Minister chuan rawtna lut tawh leh la lut turte chu Meeting lehpek a Agenda-ah dah nghal a ni dawn tih a sawi a ni.