Mizoram Khawpui Fai Inelna 2023-ah Serchhip in lawmman pakhatna a dawng
Kum 2017 atanga Urban Development & Poverty Alleviation Department-in a buatsaih thin Mizoram Khawpui Fai inelna hi nikum (2023) atan October ni 9, 2023 atanga November ni 30, 2023 chhung khan neih niin nimin khan lawmman semna hun, Award Ceremony of Mizoram Cleanliness Competition 2023 & Swachhata Symposium 2024 chu nimin khan Aizawl-ah neih a ni a. Mizoram Khawpui Fai Inelna-ah hian Mizoram chhunga Notified Towns 28-te Faina leh Thianghlimna kawngah inelin kuminah hian Mizoram khawpui hrang hrangte chu Category pathum (3)-ah then an ni a. Khawpui Fai Inelna endiktu tur hian NGO hrang hrang atangin mi thiam tak tak te Panel of Judges atan Sawrkarin ruatin, December, 2023 chhung khan endikna hi kalpui a ni.
Tun tumah hian Category-II ah Aizawl leh Lunglei tiam lovin District khawpui hrang hrang 9 te inelin Serchhip chuan lawmman pakhatna dawngin Certificate leh Rs. 3,00,000/- hlan a ni a, he lawmman hi District Urban Development Officer (DUDO) Gaston Vanlalhriatpuia chuan UD&PA changtu Minister K. Sapdanga hnen atangin a dawng a, Serchhip-a UD&PA Department-a thawktu ten an tawiawm a ni. He Category-ah hian Khawzawl chuan lawmman pahnihna dawngin Certificate leh Rs. 2,00,000/- hlan an ni a, pathumna Siaha chuan Rs. 1,00,000/- leh Certificate an dawng ve bawk. Mizoram Khawpui Fai Inelna ah hian Category-III (Urban Towns)-ah Urban Towns 17 te inelin Biate chuan lawmman pakhatna an la a, pahnihna Phullen leh pathumna Ngopa te niin Category-I(A)-ah AMC huamchhunga Local Council 85 te inelin, Category I(B)-ah LMC huamchhunga Local Council 24 te an inel bawk a. Special Prize ‘Fastest Mover Urban Town’ chu Lengpui in an dawng bawk.
Mizoram Khawpui Fai Inelna hi Ministry of Housing & Urban Affairs in kumtin-a a buatsaih thin, India Ram Khawpui Fai Endikna, Swachh Survekshan atana Mizoram khawpuite inbuatsaih lawk theihna tura neih thin a ni a, Swachh Survekshan-ah hian Mizoram chhunga khawpuite pawhin lawmman 13 lai an lo dawng tawh a ni.
Mizoram Khawpui Fai lawmman semna neih rual hian Swachhata Symposium neih nghal a ni a, District leh Mizoram khawpui hrang hranga sawkar mi pawimawh tak tak telin, he hunah hian mi thiam tak tak ten bawlhhlawh sawngbawl dan tha zawk leh bawlhhlawh tuiril sawngbawl dan turte zirtirin, Mizoramin Faina leh Thianghlimna mai bakah ram hmasawnna tura bawlhhlawh sawngbawl kawnga hmachhawp te sawiho a ni.
Comments
Post a Comment