District Council te chungchanga State sawrkar inrawlhna Assembly House-ah sawifiah a ni

District Council & Minority Affairs Minister C. Lalsawivunga’n Autonomous District Council (ADC) pathumte inrelbawlna chungchang ah Governor thupek ni lovin District Council & Minority Affairs Department a inrawlh hriat a ni lo tih a sawi.

Nimin-a Mizoram Assembly Session-ah Member te zawhna chhangin DC&MA Minister C. Lalsawivunga chuan Autonomous District Council-ah an hnuaia hnathawkte aikal awm zat zawh a nih thu leh hei hi DCMA Department-in DP&AR atanga thu an hmuh angin hma an la tih a sawi a, sawrkar thar, kalphung tharin ni 100 chhunga a tih tur Chief Minister-in a puan zinga mi a nih avangin DC&MA chu Administrative Department a nih angin ADC pathumte dinhmun, aikal chungchangah sawrkar-in a hriat duh te hre tura zawhna a zawh chu an thuneihna chhuh tumna a ni lo tih a sawi a ni.

Hemi chungchangah hian INC Member C. Ngunlianchunga chuan ADC pathum te dinhmun hriatthiam a ngai nia sawiin, ram Danpui hnuaia dan hran nei an ni a, State sawrkar a inrawlh tur a ni lo, a ti a. State sawrkar kalphungah Dy. Secretary a ni emaw, Under Secretary a ni emaw, lehkha an thawn tur a ni a, ADC hnuaia hnathawk aikal chungchangah DP&AR Department kaihhnawih an ni lo a, State sawrkar-in a thuneihna a hriatchian a ngai tih a sawi bawk.

He zawhna kal zelah hian MNF Member Robert Romawia Royte chuan CADC-a CEM nilai RM. Chakma chu MLA a nih bawk avangin Office of Profit Dan bawhchhia ang deuha puhin Show Couse Notice pek a nih thu a sawi a. Autonomous District Council-a Member leh State Assembly-a Member nih kawp chungchang chu House Leader Lalduhoma chuan sawifiahin, Larsap-in hriat duh a neih avangin file kaltirin a zawt niin a sawi a, Larsap thupeka ti an ni a, dan an bawhchhiat chuan an chunga rorel theitu chu Assembly Speaker niin a sawi a. State Assembly leh ADC-a Member nih kawp chu Office of Profit ni lovin Dual Member a ni a, Mizoram sawrkar-in dan a nei a, chu chu Larsap-in a hrechiang duh a, a ban theitu chu Assembly Speaker a ni a ti.

Hemi chungchangah hian Congress Member C. Ngunlianchunga chuan, ADC te’n dan an nei a, ADC leh State Assembly-ah member a nih kawp theih niin a sawi ve thung a. Speaker Lalbiakzama chuan, Office of Profit-ah chuan Larsap-in a en ang a, thutlukna siam lovin ECI ngaihdan a zawt tur a ni a, Larsap-in tul leh tha a tih angin, a case-a zirin ban awm a tih chuan ban theitu chu amah Larsap niin a sawi a. Office of Profit chu Larsap kut a ni a, dual member pawh a ngaihtuahtu a awm niin a sawi bawk.