India Vice President in Mizoram University Convocation vawi 18-na a hmanpui

Mizoram University Convocation vawi 18-na chu nimin khan neih a ni a, he hun hi India Vice President Jagdeep Dhankar chuan khuallian nia hmanpuiin MZU-a Chief Rector leh Governor Dr. Hari Babu Kambhampati bakah Chief Minister Lalduhoma leh Babasahep Bhimrao Ambedkar University-a Chancellor ni thin Prof. Prakash Bartunia te chu khualzahawm an ni.

MZU Convocation-ah hian Vice President chuan Zirlaite chu kumtluana an hahpui, rim taka lehkha zir-a an sual chhuah Degree tha tak tak an nei thar chu a lawmpui tih a sawi a. Mizoram chhunga mi leh zirlaite chu midang te aia tang zawk tura chahin, an hmaah tih tur leh hmalak tur tam tak a awm nghal tih a sawi a. Hlawhchham hlauh lohna chu hlawhtlinna bulpui a nih thu sawiin, Act East India hnuaia hmalakna hrang hrang te a tahtawlin tihhlawhtlin mek a nih thu leh heng ah hian thawh tur tam tak a awm dawn tih a sawi a. Tourism Sector-ah phei chuan thawh tur a tam hle a ni, a ti.

Vice President chuan Thalaite chu India ram hmasawn leh than nasat lai taka an vanglai an hmang chu an vannei a tih sawiin, India ramin Ram hausa leh ram changkang 2047 a lo thlenin nih a tum tih a sawi a; hemi atan hian Mizoram thalaite chu a thawh hlawk ber zingah tel tum turin a chah a. Intluktlanna a pawimawh thu pawh sawiin, eirukna do tlat turin zirlai kalkhawmte chu a chah a, an ngaihtuahna te tihniam loa, theih loh nei lo an ni tih hre turin a chah bawk a. Mizoram chu ram nuam tak a nih thu sawiin, a ram leilungin a zir avangin khualzin hiptu tha tak a ni thei tih a sawi bawk.

MZU Convocation hi Registrar Prof. Lalnundanga chuan MZU Vice Chancellor Prof. Dibakar Chandra Deka phalna lain a hawng a. Vice Chancellor in inlawmna thu sawiin a chhunzawm nghal a. He hunah hian Vice President kut atangin Gold Medalist mi 56 zinga mi 10 hnenah leh Ph.D hmu thar mi 10 ten Tangkapui an dawng bawk a. Mizoram Convocation vawi 18-na ah hian Degree dawngtu mi 7980 awmin a hmunah mi 1104 an tel a. Doctor of Philosophy dawngtu 110 awmin Master’s Degree dawng 518 leh Master’s Professional dawng mi 141 an awm a ni.