Sawrkar intiamna chu mawhphurhna lak ngam leh sawrkar inrelbawlna-a langtlang taka hmalak a ni - Larsap

Mizoram Legislative Assembly pakuana thutkhawm vawi 2-na, Budget Session chu nimin khan Assembly House-ah tan a ni a, Larsap Dr. Hari Babu Kambhampati chuan Member-te hmaah thu sawiin, sawrkar intiamna chu mawhphurhna lak ngam leh sawrkar inrelbawlna kawng hrang hranga langtlang taka hmalak a nih thu a sawi.

Thla thar March 13 thlenga neih tur Mizoram Legislative Assembly 9-na thutkhawm vawi 2-na, Budget Session-ah hian thutkhawm tan ni-ah Larsap hian House chhungah thu sawiin a Sawrkar chuan inrelbawlna chhawng hrang hrangah Sawrkar chak, langtlang leh rinawm, harsatna te sukiang tura rang taka hma la thin leh mawhphurhna la ngam Sawrkar rinawm nih tlat an tum tih a sawi a. “Ei leh bara intodelhna te, hmasawnna ruhrel pawimawh tak tak din te, Agriculture leh Industry-a hmasawnna nasa zawk thlen te, kan thalaite thiamthil tihhmasawn kawngah te, an tan mahni kutkawiha eizawnna leh Sports lama hmasawnna kawng zau zawk hawnsak te chu Sawrkar hmathlir a ni,” a ti. Governor chuan nikum kumtawp lama Mizoram Inthlanpui neih ah Sawrkar inrelbawl danah te, a ngaihpawimawh leh thiltum ah te danglamna hmuh mipuiin an beisei tih a lang nia a hrtiat thu sawiin, “Chu an beiseina te chu tihhlawhtlin ngei a nih theih nan Sawrkar chuan theihtawp a chhuah dawn tih ka tiam e,” a ti.

Governor chuan Budget hian a tum ber chu khawtlang leh sum leh pai hmasawnna atana thil tum hrang hrangte tihlawhtling tura theihna (resources) kan neih hrang hrang te hman tangkai a ni tih pawh sawiin, “Budget tin hian kuthnathawktute, mahni kutkawiha eizawngte, sumdawngte leh eizawnna dang hrang hrangah hmasawnna boruak tha siam sak a, mi thenkhat tan chauh ni lovin mipui zawng zawng tan hmasawnna thlen a tum tur a ni,” a ti a. “Vawiina kan thu puan tur hian naktuk chanchinbu headline a chang dawn em tih chu kan ngaihpawimawh hmasak ber tur a ni lo - tun atanga kum reilote ah Mizoram-ah danglamna duhawm zawk a thlen ang em tih a pawimawh zawk a ni,” a ti bawk.

Sum leh pai dinhmun siamtha turin kawng hrang hranga hmalak an mamawh tih Governor chuan sawiin, Sawrkar sum fir taka hman te leh inrenchemna kalpuite, sumpai, tha leh hmanraw neih angte awmze nei leh hmangchang hre taka hman a pawimawh dawn tih a sawi a, kum khat chhung sum leh pai dinhmun sawhngheh nana hman anih dawn thu sawiin, heng bakah hian a theihna apiangah tan la in sum lakluhna lam ngaihtuaha tihpun a ngai tih a sawi a. “Kan tum ber chu Mizoram chu Welfare State dik tak, mahni inrintawkna neia siam leh  hmasawnna chu mi zawng zawng huapzo, nghet tak leh rorelna langtlang leh mipui telna hmuna chantir hi a ni tur a ni,” tiin hemi lam hawi hian Mizoram Sawrkar chuan hmasawnna tur thiltum pathum inzawmkhawm tlat, hmasawn zawnga than, hmasawnna ngelnghet siam leh Dan dik tak behchhana hmalakte chu inrualkhai taka kalpui a nih theih nan theihtawp chhuah a tum thu a sawi bawk.

Tun dinhmunah sum leh pai indaihlohna a nasa hle tih Governor chuan sawiin, State Own Tax Revenue a tam loh avang te, Post Devolution Revenue Deficit Grant tihhniam a nih avang leh Investor an tlem avangin State-in sum a puk a ngai tih a sawi a, chutihlai chuan harsatna sukiang turin ngaih-tuahna thar leh kawng thar a awm zel dawn tih a sawi.

Dr. Hari Babu Khambampati chuan sawrkar hmachhawp hrang hrangte sawiin, a ngaih pawimawh tur laite leh a sawrkar tharin hmasawnna thlen tura hma a lak dan tur tlangpui te a sawi a, Sawrkar Policy thar, Hand Holding Policy, 'Bana Kaih' chu sawrkarin a kalpui thuai dawn tih a sawi bawk a. Mizoram Sawrkar in a ngaih pawimawh zingah inkalpawhna kawng tha zawka siam a tel thu te, kawlphetha siamchhuah leh intodelhna atan theihtawp a chhuah a nih dawn thu leh Chhawmdawl ngai zawk leh mi harsa zawkte chhawmdawlna chu ngaih pawimawh a nih thu a sawi bawk.