Ruihhlo hmansual vangin mi 10 thi leh tawh

Mizoram-ah kumin chhungin ruihhlo vanga thi mi 10 an awm tawh a, kum 1984 atanga kumin thlengin ruihhlo vanga thi mi 1,820 an awm tawh a. Mizoram Police-te chuan nikum chhung khan ruihhlo chi hrang hrang cheng vbc. 49 chuang hu man an nei.

Excise & Narcotics Department hotute sawi danin kumin (2024) chhung hian February 23 thleng khan Mizoram-ah ruihhlo vanga thi mi 10 awm tawhin heng te hi mipa pakua leh hmeichhe pakhat an ni a, heng te hi Heroin leh damdawi dang tihpawlh vanga thi an ni. END chhinchhiah danin kum 1984 atanga kumin thlengin Mizoram-ah ruihhlo vanga thi mi 1,820 an awm tawh a, heng te hi mipa 1,600 leh hmeichhia 220 an ni a. Nikum chhung khan Mizoram-ah ruihhlo vanga thi mi 74 an awm a, mipa 62 leh hmeichhia 12 niin nikum kha kum 2004 hnu lama ruihhlo thihpui tam ber kum a ni. 

Hetihlai hian nikum chhung khan Mizoram Police-te chuan Heroin kg. 68.55, Methamphetamine kg. 154.172, Crystal Meth kg. 49.05, Ganja kg. 112.943, Pseudoephedrine kg. 210.71, Opium kg. 4.918 leh Codeine bottle 112 an man a, heng an thil man hlut zawng hi Rs. 49,02,42,395 a ni. Ruihhlo an man kaihhnawihah hian thubuai 273 siam niin ruihhlo nena inkungkaih mihring 385 man an ni a, heng zinga 55 hi Myanmar lam mi an ni.