Civil Hospital, Aizawl tihchangtlunna tur hawng

Health Minister Lalrinpuii chuan nimin khan Civil Hospital, Aizawl-ah Biometric Attendance, Medical Record Digitalization, CCTV, Hospital Pharmacy, Jan Aushadhi, Hospital Website, Online OPD Registration & UPI Payment, SMS Lab. Report, OPD Ticket Counter leh HIV Viral Load Machine te a tlangzarh.

Heng khawl hrang hrang tlangzarhna ah hian Health Minister chuan natna enkawlna kawnga hmasawnna pawimawh tak tur tlangzarh a ni chu lawmawm a tih thu leh tangkai taka hman a nih hlawm a beisei thu a sawi a. Thawktute chu mipui rawng-bawltu an nih hre reng chunga theihtawp chhuah a hna thawk zui zel turin a chah a. “Mipui min mamawhtute avanga he Department a awm hi kan ni a, min dawrtute hi kan tana mi pawimawh te an ni, chuvangin tute pawh i ngaipawimawh ang u,” a ti.

Nimin-a tlangzarh tak Biometric attendance hi thla khat (1) vel trial run neih anih hnuah mumal zawk a hman tan a ni a. Hospital damlo zawng zawng te chu an record kimchang kum 10 chhung dah that anih hnuah kum 10 chin bak chu halral zel a ni thin a, heng damlo history record vawn that te hi Research tih nan leh thil dang atan mamawhna alo awm tak zel avangin December, 2023 thla attang khan Digitalized a ni a, hei hian nimin khan hawn niin hemi hmang hian record tam tak rei tak tak te pawh him takin a vawng tha tawh dawn a ni.

CCTV 32 Cameras, Dual Monitoring System hi damlote leh thawktute him zawk nana bun niin Hospital Pharmacy hi damlo harsa zawkte tan pawn lama man to tak tak a lei ngai lova hlawkna um lova siam a ni a, a bik takin Dialysis, Cardiology, ICU patient te tana tih deuh bik a ni. Jan Aushadhi hi Damdawi man tlawm dawr Hospital Compound chhungah mamawhtute lei theih tura Outsource a ni a. Hospital Website hi mipuiin Hospital chungchang chiang zawka an hriat theih nana duan a ni a, OPD-a Doctor thut hun te, Birth & Death Certificate apply theihna turte, Hospital chhunga thil tih theih leh tih theih loh te, Scheme hrang hrang awm te leh thil dang ttangkai tak tak dah tura hmalak a ni a. Hriselna lam inzirtirna huang telh tur a hmalak tel niin Website address hi civilhospitalaizawl.mizoram.gov.in a ni.

Online OPD Registration & UPI Payment, SMS Lab. Report hi hi Lailen Consulting Pvt. Ltd. (app) te nen tangkawpin trial run neih mek a ni a. OPD Card la tur thui tak tak intlar ngai tawh lova mahni a lak mai theih tura pawisa pekna nen siam a ni. Investigation result pawh a theih chin chin SMS hmanga report thawn chhuah theihna tur a ni. Hei bakah hian OPD Ticket Counter siambelh a ni a, tunah hian OPD Counter 6 awmin Counter-ah hian PwD (Vohbik), Nu naupai, Naupang leh kum upa te tan counter hrang siam a ni bawk.