Mamit-a JNV Campus sak thar PM in a hawng

Mamit Luangpawl-a Jawahar Navodaya Vidyalaya, School Campus chu nimin khan India Prime Minister, Nadrendra Modi chuan biakhmuhtheihna hmangin a hawng a, hemi pual-a JNV School Campus-a hun hman chu bialtu MLA Er. H. Lalzirliana chuan a hmanpui bawk a ni.

Nimin-a JNV School Campus, Luangpawl-a mi hawnna hunah hian Prime Minister Nadrendra Modi chuan zirna kawnga hmalakna bakah India ram chawikanna tura Scheme hrang hrang kalpuite a tarlang a, heng Scheme hnuaia hnathawhte hi a chhawrtu mipui te'n tangkai leh hlawkthlak takin an hman thu biakhmuhtheihna kaltlangin a sawi bawk a ni.

JNV School School hi Mamit-ah kum 2008 atanga din/hawn tan a ni a, Zirna In hmun nghet an neih hma hian a theih ang angin hmun dangah zirna hi kalpui thin a ni a, tuna hawn tak an School Campus hi kum 2013 khan sak tan niin nikum September thla khan cheng nuai 2973.64 senga luah theiha sak zawh a ni. Campus chhungah hian Building hrang hrang Academic Building 1, Kitchen & Dinning Hall 1, Boys Dormitory 4, Girls Dormitory 2, Staff Quarter 3 leh Principal Residence 1 a awm a. Zirlai pawl ruk atanga pawl sawm thleng 155 an awm mek a, Principal hovin Staff 21 an awm bawk a ni.

JNV Campus, Mamit-a hun hman ah hian bialtu MLA Er. H. Lalzirliana chuan JNV Campus chu Mamit tan chauh ni lovin District chhung zawng zawngte ta a ni tih sawiin, District chhunga hnam hrang hrang te'n zirna hmun khata an zir chu hmuhnawm a tih thu a sawi a. Zirlai naupangte chu ngaihtuahna sang tak an neih a tul thu sawiin, Mizoram pela hnathawk thei tura inbuatsaih tur leh chumi ah chuan Hindi thiam ngei ngei tura theihtawp chhuah turin a sawm a ni.