I&PR Minister in Media Platform hrang hrangte tangkai lehzuala hman a tul thu a sawi

I&PR Minister Dr. Vanlalthlana chuan mipuite hriat tur pawimawh sawrkar thu leh hla, Scheme leh hamthatna awmte zau zawka puanzar kawngah Media platform hrang hrangte tangkai lehzuala hman a tul thu a sawi.

Mizoram Information Service Association (MISA) Annual Conference 2024 nimin-a I&PR Auditorium, Aizawl-a neih a hmanpuina ah I&PR Minister chuan MIS Officer-te chu tunlai thiamna chhuak thar leh tangkai tak takte chiang zawka hmelhriata hman tangkai zel tum turin a chah a. Allocation of Business-a lang Department hmalakna tur 15 te tha taka kalpui a nih theih nan tanlak tlan a pawimawh thu sawiin, Sawrkarin a ngaihpawimawh em em Sustainable Development Reform Policy (SDRP) leh Sawrkar policy-te ngaihven tlang tur leh mipuite'n an tangkaipui theih nan zau zawka puanzar kawngah ngaihtuahna seng zel turin a chah bawk.

I&PR Minister chuan I&PR Department chu department pawimawh tak, mipuite hriat tur information pekchhuah mai bakah inlaichinna tha public relations kengkawhtu a nih tel thu sawiin, thawktute chu sawrkar, mipui leh media-te inkarah inlaichinna tha zawk a awm theih nan public relations nihna vawngnung zel turin a chah bawk a ni.

MISA Annual Conference 2024 hi an Secretary Andrew H. Lalremruata chuan kaihruaiin Treasurer Lalnunmawii chuan hunserh a hmang a, General Secretary Malsawmsanga hnen atangin report ngaihthlak a nih bakah MISA President F. Lalfakzuala leh MISA Patron & I&PR Director C. Lalnunkima bakah I&PR changtu Secretary Teresy Vanlalhruaii  te chuan thu an sawi a, MIS Officer tharte inhmelhriattirna hun hman a ni bawk.