Jail-a tang mek te eizawnna neih dan tur zirtir an ni

Serchhip District Jail-a tang mek te tana ‘Skill Development Training’ buatsaih chu nimin khan a hawnna hun hman a ni.
Serchhip-a District Legal Sevices Authority (DLSA) bultuma Krishi Vigyan Kedra (KVK) Serchhip District North Vanlaiphai buatsaih Serchhip District Jail-a Skill Development Training hawnna hun hi District Legal Services Authority (DLSA)-a Member Secretary Josangzeli Tlau chuan kaihruaiin Ser-chhip District Chief Judicial Magistrate (CJM) R. Malsawmdawngzuala chuan Training hi a hawng a, Serchhip District Jail-a Skill Development Training hi Jail-a awm mek ten Jail an chhuahsan hunah pawh kutthemthiamna thil (Skills) nei chunga an hmalam hun an hman chhoh zel theihna tura ruahman a ni.

Nimin-a Training hun khatna ah North Vanlaiphai KVK-a Sr.Scientist & Head Dr. T. Vanlalngurzauva chuan KVK nihphung leh an hnathawh dan tlangpuite sawiin, Dr. C. Lalrem-ruata, Animal Science-a Subject Matter Specialist (SMS) chuan hlawk zawk leh awmze nei zawka Vawk, Ar leh Kel vulh dante zirtirin Kenny Zohmingliana SMS (Agronomy) chuan awmze nei zawk leh hlawk zawka Thlai chin leh thar dan a zirtir bawk a. Hun hnihna ah K. Lalmalsawmi SMS (Home Science) chuan Sahbawn tui siam dan zirtirin Jeffrey Lalhmingmuana, Programme Assistant in Pa khawi dan a zirtir bawk. 

Serchhip District Jail-ah hian Jail tang mipa 50 leh Hmeichhia 8, an vaiin mi 58 an awm mek a ni.