Nagar Van Yojana Scheme (City Forest) hnuaia Entlang-a hmalakna YMA ten a hmunah an tlawh

Environment, Forests & Climate Change (EF&CC) Department hnuaia Nagar Van Yojana Scheme (City Forest) atanga Serchhip Entlang Social Forestry-a hmalakna kal mek chu nimin khan Serchhip Sub-Hqrs. YMA hruaitute leh Media & Documentation Committee chuan a hmunah kalin hnathawh te an enfiah.
Serchhip Sub-Hqrs. YMA in a enkawl, Entlang-a Social Forestry hi Nagar Van Yojana Sheme hnuaiah hian kawng hrang hrangin a cheibawl leh thuamthat hna hi kalpui a ni a, nimin-a hnathawh dan entu Serchhip Sub-Hqrs. YMA hruaitute leh Media & Documentation Committee hruaitute hi helai hmuna hnathawktute chuan lo dawngsawngin an hmalak dan tlangpui an lo hrilhfiah a. He huna tarlan a nih danin he hna thawhna tura sum awm zat chu cheng nuai 132 niin, heta tang hian thing engemaw.zat phun belh tur a nih thu an sawi a, Fur ruahtui luangral tur khawlna tur hmun ruk (6) ah siam tum anih thu te, ruahtui dahkhawlna tur siam te, mihring ke-a kalna tur Track siam te, Interpretation Centre sak te bakah helai hmuna Dil awmsa chu cheibawlin a chunga Lei dawh te chu an hna kalpui tur a nih thu an sawi a, Entlang Community Forest huam chin hung hna pawh zawhfel thuai a nih tur leh a panna kawng pawh siam a nih tawh thu te a sawi bawk a ni.


Entlang Community Forest hi tunhma deuh VC pakhat enkawlna hnuaia Serchhip khua a awmlai chuan ‘Village Reserve Forest’ tih a ni a, kum 1983 atang khan YMA kutah hlan niin ‘Social Forestry’ tih a ni zui a, Serchhip Branch YMA ten enkawlin kum 1993 atangin Serchhip Joint YMA enkawlna hnuaiah a awm leh a. Kum 2008-a Serchhip Sub-Hqrs. YMA din a nih avanga Joint YMA thiah a nih tak hnu khan Sub-Hqrs. YMA hian a enkawl zui hna a thawk a. A enkawltu tur mi pakhat Vawiin thlengin an la ruai a, a zau zawng hi Hectare 100 a ni. Helai hmun hi Research beitu zirlai engemawzatin an zirbingna behchhanah an rawn hmang tawh thin a, Thing leh Mau upa tawh tak takte bakah ramsa leh sava chi hrang hrangte an awm a. Nagar Van Yojana hnuaiah hian ramngaw tichhe chuang lovin khawpui in boruak tha a hmuh theihna tur atan kawng hrang hranga cheibawl tur niin mipuite tan pawh tlawh manhla ni thei tura ruahman a ni bawk.

Serchhip Sub-Hqrs. YMA hruaitute hian Social Welfare & Tribal Affairs Department kaltlanga Serchhip Bazar YMA Building-a Community Centre sak mek (Vertical extention) pawh tlawhin tunah hian sum ruahman atangin1st Instalment leh 2nd Instalment cheng nuai 22.5 chu hmuh a ni tawh a, a bak sum dang chu instalment hnih-a hmuh leh beisei niin Fur ruahtui tlak hmain hna hi zawhfel hman tum a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni