Mahni eizawnna lam thawk mumal hman lo khawpa pawl danga inhman vak vak a tha lo - Chief Minister

Chief Minister Lalduhoma chuan mahni eizawnna lam thawk mumal hman lo khawpa pawl danga inhman vak vak te chu a tha lo takzet tih a sawi.

Mizoram Civil Services (Combined) Competitive Examination 2023 a tling te lawmpuina hun Zonet Cable TV-in Vaivakawn Cultural Centre-a Zirtawpni kalta zana an buatsaih a hmanpuina ah Chief Minister Lalduhoma chuan kan hnate chu hna nuam leh awlsam lam a ni vek ngai lova, hun harsa leh khirh tak tak a tam thin hle zawk tih sawiin, mahni eizawnna lam thawk mumal hman lo khawpa pawl danga inhman vak vak te chu a tha lo takzet tih a sawi a. Hmun hrang hranga insawn kual te a tul fova, chhel tak leh taima taka awm a ngai tih sawiin, inenkawl fel thin mi nih pawh a pawimawh thu a sawi a. Kawng dik lo chu a zawhtu an tam vang mai in a lo dik ta tihna a ni ngai lo tih sawiin, Mizoram Civil Services (Combined) Competitive Examination 2023 a tling thar te chu a hunah chuan "No Sir" tih a tul chang a awm thin tih hre turin a chah a, “Dikna lo dinpui ngam ula, in dik chuan in huai dawn a ni,” a ti bawk.

Mizoram State chu kum 40 a tling dawn tawh tih pawh Chief Minister chuan sawiin, “State dangah han zinchhuak ila, kan lo la hnufum bikzia hi a lo chiang thin,” a ti a. “Nang leh kei hi he ram siamtha tura koh kan ni a, Politic atanga tih chi a awm a, Official atanga tih tur chi a awm bawk a. Mahni zawnah theuh kan ram tana kan thawh a tul a ni,” tiin Officer tharte chu ram tana an theihna hmang turin a chah a. Officer thar te chu a lawmpui thu leh Pathian tih chunga an hnate thawk tura a chah bakah Officer inngaitlawm ten an chetziain mipuite thinlungah thu ropui tak a sawi thin thu a sawi bawk.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni