ZMC Faculty & Doctors Association in CM an kawm

Zoram Medical College Faculty & Doctors Association (ZFDA) hruaitute chuan nimin khan Chief Minister Lalduhoma chu a Pisa-ah kawmin an ngaih pawimawh te an thlen bakah Chief Minister pawhin an hmalakna te a lo hrilh bawk.

ZFDA hruaitute hian Chief Minister hi lawmpuina hlanin, ZMC hmasawnna tur a ngaihpawimawh avangin Delhi thlenga an mamawh a sawisak chu an lawm hle tih an hrilh a, ZMC President a nih anga an hmunhmate tlawh turin an sawm bawk a. CM Relief Fund atan Rs. 40,000/- an hlan bawk a. Chief Minister hi Adviser to Chief Minister TBC. Lalvenchhunga chuan a tawiawm a ni.

Chief Minister hian ZFDA hruaitute chu lawmthu hrilhin, ZMC in National Medical Commission endikna a paltlang theih nana hma a lak dan tlangpui a lo hrilh a. Tun leh tuna mamawh nghal thilte lei nan Mizoram sawrkarin cheng vbc. 1.2 an pe tawh tih sawiin, abak mamawh dangte leina leh thawhna tur pawh central sawrkarah in phalsak angin fund an dil tih a sawi a. MP Election Model Code of Conduct an puan hma ngeia a hmahruai an rawn pek hman an beisei tih a sawi a ni. Chief Minister chuan National Medical Commission tehna thil tam takte chu Mizoram angah a tlin ve theih loh thute pawh a thlen thu leh ngaihhnathiamna min pe tura a ngen thu sawiin, “Min tihsak pawh kan beisei a ni,” a ti a. ZFDA thil thlen dangte pawh uluk taka a lo zirchian tur thu a hrilh a ni.