Kawlphetha leina atan vbc. 33-37 vel hmang thin

P&E Minister F. Rodingliana chuan sawrkar in thla khat-ah kawlphetha leina atan cheng vbc. 33 atanga 37 vel a sen thin thu a sawi.

Nimin a Mizoram Legislative Assembly Session-ah East Tuipui bialtu MLA Ramthanmawia zawhna leh zawh belhna dang chhangin P&E Minister chuan tun dinhmunah Mizoram in kawlphethar a hman san lai berin MW 156 a mamawh thu a sawi a, hetihlai hian sawrkarin kawlphetha siamchhuah kawngah theithawp chhuah a tum thu sawiin, tun dinhmun ah Thenzawl Solar Plant MW 10 thawh mek a ni tih a sawi a. North Vanlaiphai Solar Plant MW 20 peak Power Purchase Agreement ziak tura hmalak mek a nih thu a sawi a, Sumsuih Solar Plant MW 5 peak State Plan atanga thawh tum a nih thu leh Administrative approval pek chhuah tawh a nih thu a sawi a. Hei bakah hian Keifang Solar Plan MW 10-ah Power Purchase Agreement ziah a nih tawh thu leh hmalak mek a nih thu a sawi a. Kawlphetha indaihlohna chu Revamped Distribution Sector Scheme hnuaia hmalak tum a nih thu leh survey mek a ni tih a sawi bawk.

He zawhna kal zelah hian House Leader Lalduhoma chuan Kawlphetha siamchhuah nan Mizoram-a lui awm te chu khuah vek an tum loh thu sawiin, Environment a tihchhiat chu an phal loh leh hetihrual hian mamawhna a san bawk si avangin engemawzat chu loh theih loha khuah a ngaih thu a sawi bawk.

P&E Minister chuan Mizoram-ah tuitha (Hydel Power) hmangin Power Project 15 awmin chuta tang chuan kawlphetha MW 38.55 pek-chhuah a ni tih a sawi a, Lungleng bula MW 120 siamchhuahna tur Tlawng HEP Project chu survey zofel tawhin MW 150 siamchhuak thei Ngopa bula Tuivai HEP Project leh Sesawng bula MW 24 siamchhuak thei tur Tuirini Small HEP te chu DPR siam peih tawh a nih thu a sawi bawk.