Serchhip District-ah ranvulh 81,834 awmin nikum-ah Department in ran 63,086 an enkawl bawk

Nikum (2023) December thla tawp thleng khan Serchhip District-ah ranvulh chi hrang hrang 81,834 a awm nia chhinchhiah a ni a, nikum chhung vek khan Serchhip District-a AH&Vety Hospital leh Dispensary-ah ran chi hrang hrang 63,086 enkawl a ni bawk.
Serchhip-a District AH&Vety Office atanga LENKAWL in thu a dawn danin Serchhip District-ah hian nikum December thla tawp thleng khan mihring ranvulh chi hrang 10 a awm nia chhinchhiah niin heng ranvulh hrang hrang hi a vaiin 81,834 a ni a. Ranvulh zingah hian Ar tam berin 61,338 zet a awm a, a dawt-ah Vawk tam berin 10,629 awm bawkin Ar leh Vawk te chiah hi ranvulh zingah sing chuang a awm a ni. He chhinchhiahna atanga a lan danin Serchhip District-ah hian Ui 5041 awmin Zawhte pawh 2780 a awm a, Sial 630 awmin Kel 615 leh Bawnglian 577 a awm a, heng bakah hian Lawi 117 awmin Sakawr 35 a awm a, Beram pawh 8 a awm nia chhinchhiah a ni bawk. Heng ranvulh hrang hrangte hi Serchhip-a District Vety Hospital bakah Vety Dispensary 7 leh RACH pahnih a thawktu ten an chhinchhiah a ni.

Hetihlai hian Serchhip District chhunga Veterinary Hospital leh Dispensary hrang hrang ah te hian nikum chhung khan ran chi hrang hrang 63,086 enkawl a ni bawk a, ran 3058 te chu zai a ni a. Hemi hun chhung hian Bawngpui 121 te chu kahrai niin heng atang hian Bawng note 18 a piang a, Vawkpui 231 kahrai ni bawkin heng atang hian Vawk note 557 a piang bawk a. Nikum chhung khan Ui 583 te chu Ui a hri danna pek niin Vawk 5139 te chu Vawk Pul hri, CSF vaccine pek an ni a, Bawng leh Sial 31 te chu Foot and Mouth Disease (FMD) Vaccine pek an ni bawk. Nikum chhung vek khan Serchhip-a District Poultry Farm atangin Artui 46,664 tharchhuah niin sawrkar Revenue-ah Rs. 3,91,527/- chhunluh a ni bawk.

Nikum (2023) chhung khan AH&Vety Department hian FOCUS hnuaiah mi 7 te chu Vawk In an sak sak a, mi 200 hnenah vawk note pahnih theuh subsity-a pein Kel vulhtu mi 5 te hnenah Kel 5 theuh an pek bakah mi 50 hnenah Kel note pahnih leina tur an pe a, mi 300 te hnenah Ar note 20 theuh leh a chaw pekna leh tui pekna bakah Ar chaw te an pe bawk.

National Livestock Mission (NLM) hnuaiah pawh tanpuina chi hrang hrang semchhuah niin Backyard Poultry hnuaiah mi 50 te chu Rs. 9000/- theuh pek an ni a, Innovative Poultry Productivity Project hnuaiah mi 85 te chu Rs. 15,840/- theuh pek ni bawkin Goatery Unit hnuaia beneficiary (Society pakhat) hnenah Rs. 1,25,400/- pek a ni a. Dairy Farmers mi 4 hnenah Chaffcutter 4 leh Silage drum pahnih theuh pein Dairy Farmers leh Piggery Farmers mi 25 hnenah Silage Drum 42 pekchhuah a ni bawk.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni