Khelo India University Games (Football) tan

Khelo India University Games (KIUG) 2023 hnuaia Mipa Football inelna chu nimin khan Rajiv Gandhi Stadium, Mualpui-ah neih tan a ni a, Team 8 ten inelna an nei dawn a ni.

Ministry of Youth Affairs and Sports, Sports Authority of India (SAI), Association of Indian Universities, Indian Olympic Association leh National Sports Federation-te tangtlang buatsaih Khelo India University Games (KIUG) 2023 hnuaia Mipa Football inelna hawnna hun nimin-a neih hi Sports & Youth Services (SYS) Minister Lalnghinglova Hmar chuan khuallian nia hmanpuiin Khelo India University Games hnuaia infiamna discipline hrang hrang zingah Mizoram in Mipa Football inelna a thleng chu lawmawm a tih thu a sawi a, India ram kil hrang hrang atanga Footballer leh anmahni tawiawma Mizoram rawn pantute thinlung taka Mizoram in a lo lawm thu sawiin, “State mawi leh sik leh sa nuam tak, fai leh boruak muanawm takah hian kan lo lawm che u a, hun nuam tak hmang turin duhsakna kan hlan che u a, a tha lam zawnga Mizoram in hriat reng pawh kan beisei a ni,” a ti.

Sports Minister chuan India rama ‘Traditional Football Power House’ tia hriat hlawh Kerela, Punjab, West Bengal leh Maharashtra atanga University Football Team an rawn tel thei chu lawmawm a tih thu sawiin, Football hmangin infiamna mawi lantir mai bakah inunauna tha siam a nih ngei a beisei thu a sawi a. Football chu infiamna chauh ni lo, eizawn nana thalai tam takte'n an hman tawh thu sawiin, India Footballer-te'n hlawh tha tak tak an neih tawh thu a sawi a. University zirlai Footballer kalkhawmte chu lehkha thiamna mai bakah Football thiamna hmanga National mai nilo, International Level thlenga hlawhtlinna chang thei tura theihtawp chhuah turin a fuih nghal bawk.

Khelo India University Games hi India rama University Level inelna sang ber niin, kumin hian North East India-a State 7 te'n an inthlen tawm a, Assam chu Main Host niin, Sports discipline hrang hrang 15 a thleng dawn a. State dang zawngin Sports discipline pakhat theuh an thleng thung dawn a, Manipur chu an ram a buai avangin an thleng dawn lo thung a. Infiamna discipline hrang hrang hmanga intihsiakna neiin, February ni 19 atanga 29, 2024 chhung a awh ang.

Khelo India University Games 2023 Mipa Football inelna bikah hian Team 8 te qualify-in, Group hnih-ah then an ni a. Group atanga a sang pahnihin Semi Final an khel anga, a chak zawk te'n February ni 27, 2024-ah Final an khel ang.

Group A: Punjabi University, Patiala; Guru Nanak Dev University, Amritsar; University of Calicut, Kerala leh University of Calcutta

Group B: Mahatma Gandhi University, Kottayam; Adamas University, Shivaji University leh University of Kerala