Sawhthing leina atan Budget-ah sum dah tum a ni

Tun dinhmunah sawrkar ruahman angin Sawhthing lei la ni lovin, sawrkar Minimum Fixed Rate-a lei turin Budget-ah dah tum a ni.

Nimin-a Assembly thutkhawm ah Siaha Bialtu MLA Dr. K. Beichhua zawhna leh zawh belhna dangte chhangin Horticulture Minister Prof. Lalnilawma chuan Sawrkarin Sawhthing chu District hrang hrangah Society kaltlangin lei a tum tih sawiin, khaw tinah emaw, District hrang hrangah emaw, Society dinna tawh phawtah chuan Society kaltlanga lei an tum tih a sawi a, a leitu tur leh Society te indawrna in an inbiakremna rate anga kalpui tur a nih thu leh Sawhthing thar chhuah ang te chu sawrkarin a Minimum Rate Rs. 50 a lei a nih theih nan budget-ah pawh dah tum a nih thu a sawi bawk.

Horticulture Minister chuan Society din tawhna te dinhmun zirchian a nih dawn thu sawiin, rintlak te chu hmanzui an nih tur thu leh ala din lohna khuaah awlsam zawka din a nih theih dan tur pawh sawrkarin a ngaihtuah mek thu a sawi a. Thlai hrang harng te chu Society pakhatin a buaipui theih chu duhthusam a nih thu sawiin, thlai anga Society indin an awm pawhin sawrkar nen enho in hmalak ho zel a nih dawn thu a sawi.

Sawhthing rate chungchangah sawrkar in quotation a chhuah dawn lo tih Horticulture Minister hian sawi bawkin, khawtina Society din te leh a leitu tur te inbiain Tender pawh a tul anga chhuahin hemi ang hian kal a nih dawn thu a sawi a, sawrkar Fixed Rate a neih sa aia hniam a awm chuan hetah hian sawrkarin hma a lak dawn thu a sawi bawk.