PM-in Railways project Sairang-ah lo hmanpui a ni

India ramchhung hmun hrang hranga Rrailways Project hrang hrang 2,054 hna bultanna tur lungphum phumna leh hna thawh zawh tawh hawnna chu nimin khan Prime Minister Narendra Modi chuan neiin he hun hi Sairang Station-ah pawh lo zawm a ni.

Sairang Station-a he hun hman ah hian PWD Minister Vanlalhlana chuan Prime Minister-in Railways project hrang hrang cheng vbc. 41,000 hu a hawnna programme a chhim thei chu lawmawm a tih thu sawiin, KM 51.38-a thui Bairabi-Sairang Broad Gauge Line siamna tura December ni 15, 2015 atanga hna thawh tanah Railway Station pali – Sairang, Mualkhang, Hortoki leh Kawnpui te siam mek a nih thu a sawi a, tun dinhmunah he ‘National Project’ hi zaa 92 zawh tawh a nih thu leh kumin October 2024 hian thawh zawh hman beisei a nih thu a sawi a. Nikum July ni 24 khan Ministry of Railways-in KM 223-a thui Rel kawng Sairang to Hmawngbuchhuah atan Final Location Survey a rawn sanction thu leh he project chungchang hi sawrkar pawhin a ngaihtuah chhunzawm mek thu sawiin, Rel lo luh hunah in sakna bungrua emaw, bungraw dang dang pawh man tlawm zawkin kan chawlut thei tawh ang a, khualzin veivak tan pawh awlsam leh man tlawm zawkin a zin theih tawh dawn a ni, a ti.

He hunah hian Lok Sabha MP C. Lalrosanga pawhin Mizorama Rel kawng siamna leh a kaihhnawih hna ah te tualchhung mite a tam thei ang ber chhawr a tul thu leh Railways hna atana Mizo thalai train theih ang angte train a tul thu sawiin, hemi atan hian Mizoram sawrkar leh Railways thuneitute hma la turin a ngen a. Rel in Sairang a lo luh hnua Hmawng-buchhuah thlenga a kal hunah phalna nei lo leh dan lo anga hnamdang rawn lut an awm lohna tura ruahmanna siam turin Mizoram Sawrkar leh Railways thuneitute ngen bawkin, khauh taka dan kengkawh turin a ngen a. Rel kawng leh a bungruate venhim a tul thu leh Mizoram a lut tur Rel kawngte tihchhiat leh dan chah phal tur a nih loh thu te pawh a sawi bawk. Lok Sabha MP chuan KM 223-a thui, Lawngtlai District-a Hmawng-buchhuah thlenga rel kawng siam tum mek chuan ram dangte nena insumdawn tawnna leh bungraw phurhna kawngah Mizoram leh State dangte tan hlawkna tam tak a thlen thei dawn tih a sawi bawk.

Bairabi-Sairang Rel kawng, Broad Gauge Line hi KM 51.38 a thui a ni a, November ni 29, 2014 khan he Project atan hian lungphum phum niin December ni 15, 2015 atang khan hna thawh tan a ni a. He BG Line-ah hian Railway Station pali - Sairang, Mualkhang, Hortoki leh Kawnpui-ah te siam mek a ni a. Tun dinhmunah he 'National Project' hi 100-ah 92 (92%) zawh tawh a ni a, kumin October thla hian thawh zawh hman beisei a ni.