Bungrua leh hmunhma hman tangkai loh sawiho

Adviser to Chief Minister (Implementation of Hand-Holding Policy) KC. Lalmalsawmzauva chuan nimin khan Khawzawl tlawhin sawrkar Department hotute nen District chhunga sawrkar bungrua/hmunhma hman tangkai loha awm mek (Non-Functioning Assets) chungchang an sawiho.

Khawzawl DC Meeting Hall-a thutkhawm ah hian Adviser to CM chuan ‘Kalphung thar – Mipui Sawrkar’ siam an tumna kawngah sawrkar hnathawkte tawiawmna leh phur puina an dawng tha hle ni a an hriat thu sawiin, lawmthu a hrilh a. Mizoram sawrkar chuan Hand-Holding Policy chu thuang hniha kalpui a tum mek a ni tih sawiin, a thawhkhatnaah sawrkarin a tarlan thlai chi li chingtute ‘ban a kaih’ hmasak tum an ni a, hei hian kum 2-3 hnuah chuan tharchhuah chuangliam (excess production) thlenin Mizoram chu ‘Market Economy’ ah a hlankai beisei a ni, a ti a. Mizoram in tharchhuah chuangliam a neiha ‘Market Economy’ a a luh theih chuan thalai lehkhathiam ten thlai thar sawngbawlna (processing, packaging etc) an kalpui ang a, Hand-Holding Policy thawhhnihnaah chuan heng ‘1st Generation Enterpreneur’ te hi an ‘ban ah kaih’ a ni dawn a ni, a ti bawk.

Mizoram sawrkar chuan Mizote chu a huhova che thin, Communitarian Society an nihna ang leh khawvel kal zela ‘Capitalist Society’ ziarang an kai tawhna behchhanin mipuite ‘ban a kaih’ a tum mek tih Adviser to CM chuan sawiin, Sawrkarin he policy a kalpuina kawngah hian khawl thar bun ai chuan a awm sa tihchangtlun belh emaw, hman tangkai lehzual dan zawn emaw thaa a hriat thu te, sawrkarin thlai leina rate a siam chhan chu kuthnathawktu ten tanchhan tha, bargaining power an neih theih nan a nih thu a sawi bawk.