Serchhip-ah Kuthnathawktute thlai thar phochhuahna hun 'Thlai Thar Kut-cum-Exhibition' neih a ni

Serchhip District-a thlai chingtu ten an thlai tharchhuahte man tlawm zawka mipui lei theih tura an phochhuahna hun, 'Thlai Thar Kut-cum-Exhibition' chu nimin khan Serchhip Bazar Building-ah neih a ni a, intihsiakna hrang hrangah lawmman semna neih nghal a ni bawk.

'Thlai Thar Kut-cum-Exhibition' hawnna hun hi Serchhip Sub-Hqrs. YMA Conference Hall-ah neih niin he hun hi Horticulture Department changtu Secretary K. Lalrinzuali chuan khuallian niin a hmanpui a, Kuthnathawktu hlawhtling tak takte hlawhtlinna chu sawrkar puihnaa innghat ni lovin an taimakna leh an rinawmna a innghat a nih thu sawiin, Sawrkar in alo tih ve ber chu hnathawktu taima ten hlawk zawka an tharchhuah theih nan a tihdan phung zirtir a nih thu a sawi a. Serchhip District a kuthnathawktute chu Mizoram chawmtu ni thei tura tan la lehzual tura sawmin Department a thawktute pawhin loneitute chu an mi pawimawhte an ni tih hriaa duat turin a chah bawk.

Serchhip District Horticulture Officer (DHO) R. Lalrintluanga kaihhruai he hunah hian Khual zahawm Horticulture Department-a Joint Director leh Serchhip DHO hlui, M. Vanlalzami pawhin Serchhip District chu vannei a tih thu sawiin, kuthnathawk ngai pawimawhtu Chief Minister bial a nih bakah Agriculture Department changtu Minister bial awmna a nih thu a sawi a. Serchhip District-ah thlai tharchhuahna hmun tha tam tak a awm bakah a tharchhuak thei tur kuthnathawktu taima tak tak an awm thu sawiin, kan thlai thar te a tam tih Mizoram mipui ten kan hriat mang loh lai khan Covid-19 hri leng avanga harsatna a rawn thlen khan kan thlai tharchhuah a lo tam tih mipui ten an hriat theih thu a sawi a. Amaherawh chu tunhma a kalphung anga kal a nih tawh loh avangin Department in sum a pek vak vak theih loh thu leh thlai chi te pawh duh anga hmuh theih a ni tawh lo tih te lo hriatpui se a duh thu a sawi a. An thlai chin te a man to hunlai a tharchhuak thei tura thahnem ngai lehzual turin a chah bawk.

He hunah hian Serchhip Agriculture and Horticulture Cooperative Society Chairman Lalramthara pawhin Mat Phai-a thlai chingtute chuan kan ramngaw te ti chereu lo a kut hna an thawh thu sawiin, Sawrkar in kawng hrang hranga anmahni a ngaihsak thin thu a sawi a. Tunah hian P&E Department in Eng pekna tur engemaw zat siam sak tawhin heng te pawh hi reilote ah hman theih a beisei thu leh an hman theih hunah chuan khawl tha pawh nasa zawka an hman theih an beisei thu a sawi bawk a. Mat phai-a Nul neitute behchhan hian mi tam tak, chhungkaw tam takin eizawnna an neih thu a sawi bawk.

'Thlai Thar Kut-cum-Exhibition' ah hian intihsiakna pathum- Floriculture, Vegetable leh Spices & Fruits ah buatsaih niin mi 77 in an thlai tharte an phochhuak a, heng te hi Item 21-ah then leh niin Item tinah hian lawmman siamin nimin khan sem nghal a ni bawk.