Free Movement Regime (FMR) thiah leh India leh Myanmar ramri hung tum duhlohna punkhawm nei

Mizoram-a tlawmngai pawl hrang hrang telna, NGO Coordination Committee Mizoram buatsaihin nimin khan Aizawl-a Vanapa Hall kawt-ah Central Sawrkar in Myanmar leh India ram mite Passport leh Visa tellova an inkalpawh theihna Dan, ‘Free Movement Regime’ a thiah tak leh India leh Myanmar ramri hung a tumna duhlohna punkhawm neih a ni.

He punkhawmna hun hi MZP General Hqrs. President H. Lalthianghlima chuan kaihruaiin NGOCC Chairman leh Central YMA President Lalhmachhuana chuan Zofate hi ram hrang hrangah thendarh kan ni tih sawiin,. “Kan unaute nena zalen taka inkalpawh theihna dan kan neih Free Movement Regime min thiah sak a, kan inkalpawh theihloh nana ramri min hung sak tumtu Central Sawrkar hi kan dem a, an thiltih tum hi kan dodal zel dawn a ni,” a ti a. “He FMR thiah anih theihna atan Central Sawrkar chhuanlam ber chu – Drugs tawlhruk dan nan te, Arm Rebellion (Ralthuam keng hel pawl) lo lut tur dan nan te, Smugling tihtawp nan tihte a ni a, heng an thil tihtawp tum hi ramchhung atanga thurualpuitu an neih chhung chuan tihtawp tak tak theih a ni dawn lo. Chuvangin ramri hung zawng nilova kawng danga hetiang titawp tura hmalak hi a fuh zawk a ni,” tiin “Kan u leh nau te nen hian daidanna bang in min hung hrang mahse, kan thinlung an hung tel theih dawn loh avangin thil thalo zawk a thlen phah theih a hlauhawm zawk a ni,” a ti bawk.

NGOCC Chairman chuan Sawrkar laipuiin Act East Policy a kalpui mek laia FMR tihtawp a tum leh si chu thil inkalh tak a ni tih pawh sawiin, “He FMR thiah leh ramri hung thu ah hian theihtawpa dodal turin Mizo mipui zawng zawngte kan tanrual tlat a, kan dodal ngai a ni,” a ti a. “Sawrkar laipuiin chhuanlam atana a hman heng ruihhlo tawlhruk leh smugling te hi khawchhak lama kan unaute pawh hian lo titawp a, lo insum rih ve turin ka sawm in ka ngen che u a, Zofate insuihkhawmna atana he FMR thiah leh ramri hung tum hi chak taka kan do tlan zel theih nan kan hmun theuh ah kan tih tur ve ve te ti a, kan tan tlan zel hi a ngai a ni,” a ti bawk.

He punkhawmna a tel te hian Resolution pahnih pass in India Sawrkarin Free Movement Regime (FMR) a hlip leh Indo-Myanmar ramri hung a tum chu tha an tih loh thu leh an dodal takzet tih sawiin, FMR tih thar leh a nih theihna tur leh Indo-Myanmar ramri hung (Border Fencing) tih tum hi thulh a nih theih nana NGOCC hmalakna an thlawp tlat thu an tarlang a ni.