Malaria tlemna zingah Kolasib District a tel

Kum kalta 2023 chhung khan Kolasib District-ah Malaria vei mi 29 hmuhchhuah niin Dengue vei mi 17 hmuhchhuah an ni bawk.

Nimin khan Kolasib-ah District Task Force for Malaria Elimination chu District Bawrhsap leh Chairman John LT. Sanga hovin an thukhawm a, he hunah hian Kolasib District chu Mizoram-a Malaria tlemna (Low Endemic) District pali (4) zinga pakhat a ni tih tarlan niin kum 2023 chhung khan Malaria vei leh vei loh endik 22,617 awmin, Malaria vei mi 29 hmuh an ni a; mihring 1,000 zela mi 0.31-in Malaria vei ang an ni a. Kumin January thlaa Mizoram puma Malaria case hmuhchhuah 545 zinga pakhat chu Kolasib District-a mi niin, enkawl dam tawh a ni a; February thlaah Kolasib District-ah Malaria case hmuhchhuah a la awm lo thung. Kum 2021 hnuah Kolasib District-ah Malaria vanga thi an la awm lova; District chhungah DDT kah ngaihna khua pakhat mah a awm lo bawk a ni. Hei bakah hian kum 2023 chhung khan Kolasib District-a Dengue vei rinhlelh thisen lak 215 atangin a vei hmuhchhuah 17 an awm a; thihpui erawh an awm lo bawk a ni.

Malaria umbo tura hmalaknaah damdawi-a thosilen chiah duhte tan PHC-ah chiah theih tura ruahmanna kalpui reng niin, kum 2023 chhung khan Kolasib District-ah hetiang a thosilen chiah hi 926 a awm a. Kum 2016 leh 2020-ah te khan damdawi-a chiah sa thosilen (LLIN) sem niin, kumin 2024-ah pawh hian sem leh tura ruahman a ni a. Kolasib District chhunga khua/veng 56 zinga kum 2018 - 2022 chhunga mihring 1,000 zela malaria vei 1 tal awm tlinna (above 1 API) khua/veng 24-ah LLIN (long lasting insecticide treated net) thosilen 22,865 sem theih beisei a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni