Mizoram-a rawn zin India Vice President in Mizoram Assembly Member te hmaah thu a sawi

Mizoram tlawha rawn zin Vice President Jagdeep Dhankhar chuan nimin khan Mizoram Legislative Assembly Member te hmaah thu sawiin, Mizoram-a Assembly Session lo kalpui tawh dan te a lo en thu leh felfai leh zahawm taka an thu rel dan chu lawmawm a tih thu a sawi.

Vice President hian nimin khan MZU-a hun a hman zawh hnuah Mizoram Assembly House hi pan nghalin Speaker Lalbiakzama leh sawrkar mi pawimawh ten lo dawngsawngin Speaker chuan inlawmna thu a sawi a, hemi hnu hian Assembly Member te hmaah thu sawiin, MLA zawng zawng deuhthaw House-ah an thu chu fakawm a tih thu sawiin, State dang Legislature leh Parliament-ah pawh Mizoram in attendance tha tak an nei chu a sawi zui zel tur a nih thu a sawi a. Mizoram-a Assembly Session lo kalpui tawh dan te a lo en thu leh felfai leh zahawm taka an thu rel dan chu lawmawm a tih thu sawiin, MLA te chu midang tana entawntlaka an awm zui zel a beisei thu a sawi bawk. MLA zingah hmeichhia pathum lai mai Mizoram in a nei chu sawrkarna leh ram hmasawnna in a ken tel nia a hriat thu Vice President chuan sawiin, lawmawm a tih thu leh hmeichhe kaihhruai hmasawnna lam chak takin kan pan thu a sawi a India sawrkar in inrelbawlnaah hmeichhiate tan zau zawka kawng hawng tura hma hrang hrang a lak dante leh chu chuan rah tha zawk a chhuah ngei a rin thu sawiin, nikum September ni 20 leh ni 21 khan Lok Sabha leh Rajya Sabha chuan Lok Sabha leh State Legislature-a hmun thuma thena hmun khat hmeichhiate tana Reservation siamna tur 'Nari Shakti Vandana Adhiniyam' a pawm thu a sawi bawk.

Vice President chuan India ramin nasa taka hma a sawn thu sawiin, he hmasawnna atan hian hmarchhak State – Mizoram telin an pawimawh hle thu a sawi a. Sawrkar laipui pawhin hmarchhak State te hmasawnna chu ngaipawimawh in, a enkawltu tur Department hran tawp siam a nih thu te, tun kum sawm chhung khan hmasawnna ruhrel pawimawh tak tak North Eastern Council leh sum hnar dang kaltlanga din a nih dan te a sawi a. Sawrkarin thalaite hmakhua ngaiin ruahmanna a siam a, hma a lak avangin tun hun anga thalaite’n an tuina leh an chak zawngte bawhzui a an hlawhtlin theihna ang hun tha hi a la awmlo a ni, a ti bawk.

Tunah hian India chu khawvel-a ram Economy lian 5-na a ni mek tih Vice President chuan sawiin, tun atanga kum 2, kum 3 hnuah chuan Japan leh Germany-te lehpelin, khawvel-a Economy ram lian pathumna ni tura tanlak mek a ni tih a sawi a, ram hmasawnna kawngah mipuite chu khua leh tui an nih angin mawhphurhna sang tak an nei tih hre turin a ngen bawk a ni.

He hunah hian Chief Minister Lalduhoma pawhin, kum 1972-a Union Territoty-a Mizo-ram hlankai a nih khan India chu nasa takin hma a lo sawn tawh a, Mizoram chu kum 25 zetin State dangte aiin a hnufual zawk a, hun harsa tak an paltlang hnuah kum 1986 atangin hmasawnna kawng an zawh ve tan chauh a, heti chung hian State dangte umpha turin theihtawp an chhuah ve mek zel tih a sawi a. Mizoram chu India-a State ralmuang ber a ni a, ziak leh chhiar thiam lamah pawh pathumna a ni ta hial tih a sawi a. Vice President chu Delhi-a a haw hnuah pawh Mizoram tan theihtawp chhuah zel tura ngenin, Mizoram a lo tlawh hian MLA te a tihphur mai ni loin, ram tan theihtawp chhuah lehzual tura nawr kaltu leh mipui rawngbawltu an nih anga thahnam ngaih zual tirtu a nih ngei a beisei thu a sawi a ni. 

Vice President hian Assembly House a hun a hman zawh hian Raj Bhavan-ah Governor in chawchhun a buatsaih eiin hemi hnu hian Delhi a pan leh nghal a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni