Serchhip District chhunga Bank hrang hrangte hmalak dan Bawrhsap hova thlirho a ni

Nimin khan Serchhip-ah District Consultative Committee (DCC), District Level Review Committee (DLRC) leh District Level Security Committee (DLSC) chu thukhawmin December 2023 Quarter tawp thlenga Bank hrang hrangte hmalakna leh hnathawh dan thlirlet a ni.

He thutkhawm Serchhip DC Meeting Hall-a neih hi District Bawrhsap David Lalthantluanga chuan kaihruaiin Serchhip leh Saitual District bialtu Chief Manager (Lead Bank) Robert Zosangliana chuan thutkhawm an koh chhan leh thu ngaihtuah tura chhawpchhuah hrang hrangte a tarlang a. He hunah hian December 2023 Quarter tawp thlenga Serchhip District chhunga Bank hrang hrangte Credit Deposit (CD) Ratio chu 71.71 a nih thu leh hei hi sawrkar in a hniam ber ni tura a bithliah chin aia tha a nih thu tarlan a ni a. Chutihrual chuan CD Ratio hniam zual Bank Branch te chu an CD Ratio a hniam chhan zawhfiah niin National Highway laihzauhna tura zangnadawmna la zingah Bank lama sum dahlut an tam avanga an sum dawn a tam thu leh Loan pawh a theih ang ang an pekchhuah ve thu sawiin, Loan dilna an dawn ang te chu an pekchhuah thu an sawi ve bawk a. CD Ratio hi 40% aia hniam a nih chuan a bika ngaihtuah ngai a nih avangin hetiang hi a thlen loh nana hmalak a tul thu an in chah bawk a ni.


Hei bakah hian Annual Credit Plan (ACP) hnuaia Bank hrang hrangte hmalak dan pawh he thutkhawm ah hian thlirho niin Priority Sector-ah Micro, Small and Medium Enterprises (MSME) Sector hnuaiah target chu Bank ten an tlin thei dawna a lan thu tarlan niin chutihrual chuan Agriculture Sector hnuaiah erawh hmalakna tur ala tam thu tarlan a ni a. Tunhnaia Serchhip District chhung khaw hrang hranga Vikasit Bharat Sankalp Yatra (VBSY) campaign neih ah Kisan Credit Card (KCC) Loan cheng nuai 1.6 aia tlem lak tum ten Bank lamin Guarantor an phut thu an sawi tih he hunah hian sawilan a ni a, KCC Loan cheng nuai 1.6 hnuailam la turte tan Guarantor neih a ngai kher lo tih he hunah hian tarlan niin Bank lamin hriatpuitu an phut pawh thil tul lo a nih thu tarlan a ni a, hei vang hian Bank ten Loan an pekchhuah hmain Loan diltute dinhmun an zirchian hmasak thin a pawimawh thu tarlan a ni bawk. KCC Loan chu a latu ten an lak chhan atanga an tharchhuah an seng hnuah an rulh tan theih thu pawh Loan la turte hrilh thin a tul thu pawh tarlan a ni bawk a. Bank ten KCC Loan an pekchhuah te chu Line Department te hriattir ve thin a tul thu pawh sawilan niin, hemi atan hian ruahmanna pawh siam nghal a ni bawk.

Heng bakah hian Sawrkar laipui Sponsored Scheme hrang hrang NRLM, NULM, PMEGP leh Stand Up India hnuaia Bank ten hma an lakna te, Pradhan Mantri Mudra Yojana (MUDRA) hnuaia hmalakna te, Financial Inclusion Plan hnuaia Bank ten hma an lakna te leh Social Security Scheme hnuaia hmalakna hrang hrang te he hunah hian thlirho a ni bawk a. Pradhan Mantri Mudra Yojana (MUDRA) hnuaiah mi 26 te hnenah Sishu Loan cheng nuai 12.70 pek ni tawhin Kishore hnuaiah mi 137 te cheng nuai 416.83 pek an ni tawh a, Tarun hnuaiah mi 62 te cheng nuai 492.15 pek an ni tawh bawk a ni.

Tun dinhmunah Serchhip District-ah hian Bank panga (5) awmin Bank Branch 17 a awm mek a, heng te hi Mizoram Rural Bank (MRB)-ah Branch 10, State Bank of India (SBI)-ah Branch 3, Mizoram Cooperative Apex Bank (MCAP)-ah Branch 2 leh Punjab National Bank (PNB) leh HDFC Bank in Branch pakhat ve ve te an ni.

Nimin-a thutkhawm ah hian Serchhip District chhunga Bank hrang hrang aiawhte leh Line Department aiawhte an tel tha hle a, an hmalakna kawng hrang hrangah zawhfiah ngai te inzawhfiah a nih bakah thawhhona tha neih a pawimawh thu te sawilan a ni bawk.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni