Chief Minister in NGOCC Mizoram hruaitute Myanmar ramri hung leh FMR chungchang a sawipui

Chief Minister Lalduhoma chuan NGO Coordination Committee, Mizoram hruaitute chu Inrinni khan CM Meeting Room-ah kawmin Myanmar ramri hung, Free Movement Regime leh thil pawimawh dangte an sawiho a. Sawrkar chuan Myanmar ramri hi hung tha a tih loh thu a sawi nawn leh bawk.

NGOCC hruaitute a kawmna hunah hian Chief Minister chuan Mizoram sawrkar chuan Myanmar ramri hi hung chu tha an tih loh thu sawiin, Free Movement Regime te pawh tha takin awm reng se an duh tih sawiin, “Tuna kan ramri hi British sawrkarin Divide and Rule Policy hmanga min barhluih ramri a ni a. Unau min thenhranga, kan hnam lian tak min pawtdarh a, pawm theih a ni lo a ni,” tiin Kan hmathlir leh duhaisam chu rorelna pakhat hnuaia awm a ni reng zawk tih a sawi a. Tunhnaiah Delhi-ah tum hnih a zin thu leh Union Home Minister a hmuh ve ve bakah Minister pawimawh dangte pawh a hmu tih sawiin, kan dinhmun te a hrilh thu a sawi a. “Tuna Myanmar ram dinhmun te hrilhin Manipur lam hi in lo hung a nih chuan kan sawi phak a nilova, Mizoram erawh chu hung a rem lova ni, tiin ka thlen a ni. Min lo dawnsawn dan te ka ngaihtuahin thlamuang takin kan awm thei ni ah ka ngai,” tiin hma an lakna a sawi a. “Sawrkar anga hmalakna te, NGO anga hmalakna te kan nei ang a, kan tihtlan zel hi a tha,” a ti bawk.

Chief Minister chuan Free Movement chungchang bik chu ralthuam leh ruihhlo tawlhrukna a tam em avang hi ni mah zawka a lan thu pawh sawiin, “Hemi thuah pawh hian kan Border Security Infrastructure te tihhmasawn hmasak a tul thute pawh ka thlen a ni,” a ti a. Heng bakah hian raltlante chhawmdawlna chungchang Central sawrkar a dawr dante pawh hrilhin, min tanpui tura an inhuam thu an sawi thu leh a tul angin an bawhzui mek tih a sawi bawk a. Chief Minister hian engemaw duh lohna lantira punkhawmna leh thiltihah Lim inhal sak hi chu awm lo hram se tha a tih thu leh Kristian te tihah chuan a mawi chiah lova a ngaih thu a sawi bawk a ni.

NGO Coordination Chairman Lalhmachhuana chuan, sawrkar tharah a tha zawnga thil inthlak an hmuh chhoh zel avangin lawmthu a sawi a. NGO ten ramri hung an duh lohna te, FMR hlih an duh lohna te tilang tura punkhawm huaihawt an tum dan te sawiin, chutiang lam ngaihtuaha an thawhpui Nagaland lama NGO te pawhin hma an lak ve mek thu leh palai an tirh thute a sawi a, an thilphutte chu Central sawrkar leh Mizoram sawrkar hnena ziaka an thlen tawh thute a sawi bawk a ni.

He hunah hian Bangladesh lama Zohnah-thlakte harsatna tawh mek te, Manipur atanga raltlan chungchang te leh thil pawimawh dangte an sawiho a. Chief Minister chuan Mizoramin tlawmngai pawl tha tak tak kan nei chu kan vanneih thu leh heng kan pawl pawimawhte hi mite thilpek leh thawhlawma innghat ngawt lova mahnia inenkawl thei tura lakluh nei zawnga an awm theih chu tha a tih thu sawiin, ruahmanna siam turin a chah bawk.