Mipuite aw ngaithla turin sawrkar a inpeih - CM

Mizoram State Public Grievance Redressal & Monitoring System thar, 'Mipui Aw' tih chu nimin khan Chief Minister Lalduhoma chuan a tlangzarh a, a kaihhruai sawrkar chu mipuite aw ngaithla turin a inpeih reng tih a sawi bawk.

Chief Minister Conference Hall-a 'Mipui Aw' a tlangzarhna hunah hian Chief Minister Lalduhoma chuan mipui sawrkar, langtlang sawrkar an din theih nan mipuite nen inpawhna tha tak an neih a ngai tih sawiin, “Mipuite ngaithla turin kan inpeih at reng a, keimahni duhna aia mipuite duhna dah hmasak hi kan inhuam a ni. Chu chu mipui rorelna ram democracy innghahna pawimawh a ni,” a ti a. Chumi hmanrua atana tangkai tak tur 'Mipui Aw' thar an hawng thei ta chu lawmawm a tih thu sawiin, a buaipuitu DP&AR Department leh a thawhpui Mizoram State e-governance Society te chungah lawmthu a sawi bawk.

Chief Minister chuan he Online Portal hi a hmangtu mipuite tan leh a lo chhangtu turte tan awlsamna a thlen ve ve dawn tih sawiin, Mizo tawng leh Sap tawnga hman theih ve ve a nih thu a sawi a. He Portal hmanga zawhna leh dilna te chu a changtu Nodal Department te pawhin lo ngaipawimawh tura chahin, ram mipuite rawngbawlna pawimawh tak a ni tih hre chungin an kalpui dawn tih a sawi a, mipuite tana lo inhawng hle turin a viltu tur Officer te pawh a chah bawk.

He hunah hian DP&AR changtu Minister K. Sapdanga pawhin 'Mipui Aw' hi March 1, 2012 khan a version hmasa lo hman tawh a nih thu leh kum 2019 laihawl atang khan Security thilah a him tak loh avangin an hmang zui ta lo tih a sawi a. Hun engemaw chen kan neih loh hnuin tunah Chief Minister hmalakna zarah a thar tha zawk kan neih leh tak thu leh lawmawm a tih thu a sawi a. Mipui Aw chu sawrkar tha kan neih theihna tura Mizoram mipuite sawrkarin a chona a ni tih sawiin, “Tangkai takin, hlawk takin hman kan tum dawn nia,” tiin mipuite a chah a ni.

Khua leh tui ten an harsatna te, an vuivaina te leh an chanvo te an zawhfiah theihna tur 'Mipui Aw' tlangzarhna hun hi DP&AR changtu Secretary R. Lalramnghaka chuan kaihruaiin Mizoram State e-governance Society Project Manager Isaac Zothanpuia chuan Technical Report a pe a, May 11, 2023 khan thawh tan a nih thu leh tun thla ah zofelin hawn nghal a nih thu a sawi a. A siam nan hian a hranin sawrkar pawisa sen awm lovin, Mizoram State e-governance Society mithiam ten an siam thu leh Private Company tihtir chu ni se cheng nuai 10 chuang man tura ngaih a nih thu a sawi a. Portal hi sap tawng emaw, Mizo tawng emaw duh zawk zawka kalpui theih a ni a, a hman dan inzirtirna (tutorial) pawh dah nghal a ni a. A hmang tangkai duhte tan www.mipuiaw.mizoram.gov.in-ah hman theih a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni