Hna zawng mek te rin ngam tur MPSC chhawpchhuah duh vangin MSSSB thiah a ni - Chief Minister

Chief Minister Lalduhoma chuan Mizo thalai hna zawng mek ten an rin ngam tur Mizoram Public Service Commission (MPSC) chhawpchhuah an duh avangin Mizoram Sub-Ordinate Service Selection Board (MSSSB) chu thiah a ni tih sawiin, MPSC thuamchak tum a ni tih a sawi bawk.

Nimin-a Mizoram Legislative Assembly Budget Session-a Private Member Resolution Lalrintluanga Sailo in a putluh, ‘Mizoram Subordinate Service Selection Board (MSSSB), Mizo Thalai hna zawng mekte tana rintlak leh tangkai tak thiah hi sawrkar-in ennawn leh rawh se’ tih chungchang sawihona hunah Chief Minister Lalduhoma chuan MSSSB chu sawrkar hmasa in a din dawnah fello tam tak a awm thu leh Politics a induhsakna nasa tak a awm thin thu a sawi a, MSSSB thiat mah se thalai hna zawng mek te tan beidawnna tur a awmlo tih sawiin, MPSC an thuamchak sauh dawn tih a sawi a.MSSSB thiah a nih avanga thalaiten harsatna an tawk tur ang hiala sawi a ni chu thu dik lo a nih thu sawiin, “MSSSB thiah a nih vang hian tumahin an tuar dawn lo a, tuna MSSSB in hna lakna tur Advertisement a chhuah diltute chu a thar-a dil ngai lovin, MPSC in a chhawm dawn a, dilna an thehluh laia an kum zat kha an chhawm vek dawn,” tiin tumah hnawl an ni dawn lo tih a sawi a ni.

Chief Minister chuan MPSC chu ram Danpui hmanga din leh kum 33 zet a ni tawh tih pawh sawiin, hetih chhung hian an hnalak ah sawisel emaw, thil dik lo emaw hmuh tur a la awm lo tih a sawi a. A huna hna lak theih loh awma sawrkar hnathawk kaisang turte tih khawtlai emaw a la awm lo ni-a sawiin, MPSC hian Annual Recruitment Calendar a nei vek tawh a. An hmalak dan turah felfai takin ruahmanna siam sa vek a ni a, tunhma anga harsatna awm thei a nih tawh loh thu a sawi a. Tuna MSSSB thiah tak atang hian MPSC chuan thawktu a chhawm dawn a, an buangrua thil dang zawng zawng pawh MPSC-ah hian tangkai tak-a hman a ni dawn tih a sawi a. MPSC hotute nen an inkawmna ah harsatna lian tham an nei lo tih sawiin, Hall an mamawh belh erawh sum dinhmun a zirin ngaihtuah a ngai tih a sawi a, MPSC leh MSSSB neih kawp chu a buaithlak chang a awm thin thu leh hna exam inrual a awm thin avangin harsatnna a awm thin tih a sawi bawk.

Hetihlai hian he Resolution sawihona hunah hian Opposition Leader Lalchhandama Ralte chuan thalai hna zawng mek tena an chhawr tangkai em em thiah tuma sawrkarin hma a la chu pawi a tih thu sawiin, thalai hna zawng mek ten MSSSB hna lakah a fair loh sawi tur hrelo in an rintawk em em laia Sawrkarin ram rohlu tak, sawrkar hmasa tih anih vanga thiah a tum chu pawi a tih thu sawiin, ngaihtuah tha leh se a duh thu a sawi a, MPSC pawh dan ang thlapa awm ni mahse hna la tu Board pakhat chauh ah a inthuah nasat thin vangin hna lak a muang em em a, thalai hna zawng te an khawngaihthlak tih a sawi a, thalai te hmakhua thlir chung zela rorelna keng-kawh turin sawrkar a ngen tih a sawi bawk.

Lalchhandama Ralte chuan MSSSB in hna 328 a la hman tih sawiin, heng bakah hian Limited Departmental Exam-ah mi 149 an la a, Departmental Exam pangngai ah 52, Departmental Promotion (Non-Gazette)-ah 3097, Regularized tura recommendation hi mi 166 an tihfel sak tih sawiin, hna tam tak an thawk chunga tihtawp an tum chu pawi a tih thu a sawi a ni.

Nimin-a Private Member Resolution sawihona ah hian Member 24, eptu pawl atangin 8 leh Rorellai atangin mi 16-in thu an sawi a, eptu member te chuan MSSSB chu thiah an duh loh chhan hrang hrang sawiin, rorellai member te chuan, MSSSB hnalakah thil dik lo a awm vanga thiah a nih loh thu te an sawi ve bawk a. Sawihona neih zawh hnu hian vote lak a nih hnuah he Resolution hi House chuan a hnawl a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni